रिलायबल लाइफको व्यापार २३% ले बढ्यो, जीवन बीमा कोष १९.४० अर्ब रुपैयाँमाथि

काठमाडौं । रिलायबल लाइफ इन्स्योरेन्सले चालु आर्थिक वर्ष २०८३/८४ को पहिलो त्रैमाससम्मको वित्तीय विवरण सार्वजनिक गरेको छ। कम्पनीले सार्वजनिक गरेको अपरिष्कृत वित्तीय विवरणअनुसार असोज मसान्तसम्म २२ करोड ९० लाख रुपैयाँ खुद नाफा कमाएको छ।

गत आर्थिक वर्ष २०८२/८३ को सोही अवधिमा कम्पनीले २५ करोड ८५ लाख रुपैयाँ नाफा आर्जन गरेको थियो। यसअनुसार अघिल्लो वर्षको तुलनामा चालु आर्थिक वर्षको पहिलो त्रैमासमा कम्पनीको नाफा ११.३९ प्रतिशतले घटेको हो।

कम्पनीको चुक्तापुँजी ५ अर्ब १९ करोड ६८ लाख रुपैयाँ रहेको छ। समीक्षा अवधिसम्म कम्पनीको शेयर प्रिमियममा १ अर्ब ३९ करोड १६ लाख रुपैयाँ, महाविपत्ति कोषमा ३१ करोड ३ लाख रुपैयाँ, रिटेन्ड अर्निङमा १ अर्ब १ करोड ७३ लाख रुपैयाँ र अन्य इक्विटीमा ६३ लाख १४ हजार रुपैयाँ रहेको छ।

गत आर्थिक वर्षको असार मसान्तसम्म महाविपत्ति कोषमा २८ करोड ७४ लाख रुपैयाँ, रिटेन्ड अर्निङमा ८१ करोड ३४ लाख रुपैयाँ र अन्य इक्विटीमा २ करोड ७३ लाख रुपैयाँ रहेको थियो। शेयर प्रिमियम भने १ अर्ब ३९ करोड १६ लाख रुपैयाँ नै रहेको छ।

यसैगरी, कम्पनीको जीवन बीमा कोषको आकारमा उल्लेख्य वृद्धि भएको छ। असोज मसान्तसम्म जीवन बीमा कोषमा १९ अर्ब ४० करोड ९५ लाख रुपैयाँ सञ्चित भएको छ। गत आर्थिक वर्षको सोही अवधिमा यस्तो कोषमा १४ अर्ब ३१ करोड २३ लाख रुपैयाँ रहेको थियो। यसअनुसार जीवन बीमा कोष ३५.३१ प्रतिशतले बढेको हो।

बीमाशुल्क आर्जनतर्फ भने कम्पनीले सुधार गरेको छ। चालु आर्थिक वर्षको पहिलो तीन महिनामा कम्पनीले १ अर्ब ८६ करोड २७ लाख रुपैयाँ कुल बीमाशुल्क आर्जन गरेको छ। गत आर्थिक वर्षको सोही अवधिमा १ अर्ब ५१ करोड ३७ लाख रुपैयाँ बीमाशुल्क आर्जन गरेको थियो। यस अवधिमा कुल बीमाशुल्क आर्जन २३.०६ प्रतिशतले बढेको हो।

त्यस्तै, समीक्षा अवधिमा कम्पनीको खुद बीमाशुल्क आर्जन १ अर्ब ७७ करोड ४ लाख रुपैयाँ पुगेको छ। गत वर्षको सोही अवधिमा यस्तो रकम १ अर्ब ४२ करोड ९४ लाख रुपैयाँ थियो। यसअनुसार खुद बीमाशुल्क आर्जनमा २३.८५ प्रतिशतको वृद्धि भएको छ।

नाफामा गिरावट आएसँगै कम्पनीको वार्षिकीकृत प्रतिशेयर आम्दानी (ईपीएस) पनि घटेको छ। चालु आर्थिक वर्षको असोज मसान्तसम्म ईपीएस १७ रुपैयाँ ६३ पैसा कायम भएको छ। गत आर्थिक वर्षको सोही अवधिमा ईपीएस १९ रुपैयाँ ९० पैसा रहेको थियो।

कम्पनीको मूल्य आम्दानी अनुपात (पीई रेसियो) २६.०३ गुणा रहेको छ भने प्रतिशेयर नेटवर्थ १५२ रुपैयाँ ४५ पैसा कायम भएको छ।