एमालेको केन्द्रीय कमिटी बैठक मंसिर ५ गते बस्ने

काठमाडौं । नेकपा (एमाले) ले आगामी मंसिर ५ गतेका लागि केन्द्रीय कमिटी बैठक बोलाएको छ। एमाले प्रचार तथा प्रकाशन विभाग प्रमुख निरज आचार्यका अनुसार बैठक मंसिर ५ गते बस्ने गरी तय गरिएको हो।

एमालेले मंसिर २ र ३ गते काठमाडौंको कार्की ब्यांक्वेटमा राष्ट्रिय भेला आयोजना गर्दैछ। उक्त भेलामा देशभरबाट करिब ३ हजार १०० जना सहभागी हुनेछन्। भेलाको मुख्य एजेन्डा आगामी स्थानीय तह निर्वाचनको तयारी रहेको एमाले महासचिव शंकर पोखरेलले जानकारी दिएका छन्।

राष्ट्रिय भेलालगत्तै मंसिर ४ गते एमालेले स्थानीय तहका जनप्रतिनिधिको राष्ट्रिय भेला आयोजना गर्ने भएको छ। एकदिने भेलामा २०७८ सालमा एमालेबाट निर्वाचित स्थानीय तहका जनप्रतिनिधिहरू सहभागी हुनेछन्। प्रवक्ता निरज आचार्यका अनुसार भेला बिहान ११ बजेदेखि पार्टी केन्द्रीय कार्यालय च्यासलमा सञ्चालन हुनेछ।

यसअघि एमालेको केन्द्रीय कमिटी बैठक गत असोज ५ देखि ८ गतेसम्म बसेको थियो। उक्त बैठकले पार्टीभित्रको आन्तरिक विवाद तत्काल समाधान नगरी राष्ट्रिय भेलामार्फत निकास खोज्ने निर्णय गरेको थियो। सोही निर्णयअनुसार राष्ट्रिय तथा जनप्रतिनिधिको भेला आयोजना गर्न लागिएको हो।