राष्ट्रिय जीवन बीमा कम्पनी ६५ लाख घाटामा, बीमाशुल्क आर्जन भने ६.९८ प्रतिशतले बढ्यो

काठमाडौं । राष्ट्रिय जीवन बीमा कम्पनी लिमिटेड चालु आर्थिक वर्ष २०८३/८४ को पहिलो त्रैमासमा घाटामा गएको छ। कम्पनीले सार्वजनिक गरेको वित्तीय विवरणअनुसार समीक्षा अवधिमा ६५ लाख ४४ हजार रुपैयाँ खुद घाटा व्यहोरेको हो।

जबकि गत आर्थिक वर्षको सोही अवधिमा कम्पनीले १२ लाख १२ हजार रुपैयाँ खुद नाफा कमाएको थियो। बीमाशुल्क आर्जन बढे पनि कुल आम्दानी घट्नु र खर्च बढ्नुका कारण कम्पनीको वित्तीय अवस्था दबाबमा परेको देखिएको छ।

कम्पनीको मुख्य आम्दानीको स्रोतका रूपमा रहेको खुद बीमाशुल्क आर्जन भने बढेको छ। चालु आर्थिक वर्षको पहिलो त्रैमाससम्म कम्पनीले ४ अर्ब ८१ करोड ९० लाख रुपैयाँ खुद बीमाशुल्क संकलन गरेको छ। गत वर्षको सोही अवधिमा यस्तो रकम ४ अर्ब ५० करोड ४६ लाख रुपैयाँ थियो। यसअनुसार बीमाशुल्क आर्जन ६.९८ प्रतिशतले वृद्धि भएको छ।

तर, कम्पनीको कुल आम्दानी भने घटेको छ। समीक्षा अवधिमा कम्पनीले ५ अर्ब ४५ करोड ८९ लाख रुपैयाँ कुल आम्दानी गरेको छ। गत आर्थिक वर्षको सोही अवधिमा ५ अर्ब ६२ करोड ५५ लाख रुपैयाँ आम्दानी गरेको थियो। यसरी कम्पनीको कुल आम्दानी २.९६ प्रतिशतले घटेको हो।

अर्कोतर्फ कम्पनीको कुल खर्च बढेको छ। गत आर्थिक वर्षको पहिलो त्रैमासमा ५ अर्ब ४० करोड ५४ लाख रुपैयाँ खर्च गरेको कम्पनीले चालु आर्थिक वर्षको सोही अवधिमा ५ अर्ब ४६ करोड ५५ लाख रुपैयाँ खर्च गरेको छ। आम्दानीमा आएको गिरावट र खर्चमा भएको वृद्धिले कम्पनीको नाफामा प्रत्यक्ष असर पारेको देखिन्छ।

त्यस्तै, कम्पनीको लगानी तथा कर्जाबाट हुने आम्दानीमा पनि उल्लेख्य कमी आएको छ। समीक्षा अवधिमा कम्पनीले यस शीर्षकबाट ५९ करोड रुपैयाँ आम्दानी गरेको छ। गत आर्थिक वर्षको सोही अवधिमा यस्तो आम्दानी १ अर्ब ५ करोड ३३ लाख रुपैयाँ थियो।

कम्पनीको प्रतिशेयर आम्दानी पनि ऋणात्मक बनेको छ। गत वर्ष २.६८ रुपैयाँ रहेको प्रतिशेयर आम्दानी चालु आर्थिक वर्षको पहिलो त्रैमासमा घटेर ३.६२ रुपैयाँ ऋणात्मक भएको छ।

कम्पनीको चुक्ता पुँजी १८ करोड १० लाख रुपैयाँ रहेको छ। यता सञ्चित नोक्सानी बढेर ४ अर्ब ५३ करोड ३३ लाख रुपैयाँ पुगेको छ। गत आर्थिक वर्षमा सञ्चित नोक्सानी ३ अर्ब ६८ करोड ८१ लाख रुपैयाँ रहेको थियो।

यससँगै कम्पनीको कुल इक्विटी ४ अर्ब ३१ करोड २२ लाख रुपैयाँले ऋणात्मक रहेको वित्तीय विवरणले देखाएको छ।