जीवन बीमा पोलिसी सरेन्डर गर्ने क्रम बढ्यो, व्यतीत हुने बीमालेख १६.७ प्रतिशतले घटे

काठमाडौं । चालु आर्थिक वर्ष २०८३/८४ को पहिलो तीन महिनामा जीवन बीमालेख सरेन्डर गर्ने बीमितको संख्या र भुक्तानी रकम दुवैमा वृद्धि भएको छ। तर बीमाशुल्क समयमा भुक्तानी नगर्दा व्यतीत हुने बीमालेखको संख्यामा भने उल्लेख्य कमी आएको छ।

नेपाल बीमा प्राधिकरणको तथ्यांकअनुसार चालु आर्थिक वर्षको असोज मसान्तसम्म २३ हजार ७९५ वटा जीवन बीमालेख सरेन्डर भएका छन्। ती बीमालेखको भुक्तानीबापत बीमा कम्पनीहरूले बीमितलाई ३ अर्ब ८८ करोड ९९ लाख रुपैयाँ फिर्ता गरेका छन्।

गत आर्थिक वर्षको सोही अवधिमा २२ हजार ९९९ वटा बीमालेख सरेन्डर भएका थिए। त्यसबापत बीमा कम्पनीहरूले ३ अर्ब ४८ करोड ८५ लाख रुपैयाँ भुक्तानी गरेका थिए। गत वर्षको तुलनामा चालु आर्थिक वर्षमा बीमालेख सरेन्डर गर्ने संख्या ३.४६ प्रतिशतले बढेको छ भने फिर्ता गरिएको रकम ११.५० प्रतिशतले वृद्धि भएको छ।

यसले बीमा अवधि पूरा हुनुअघि नै पोलिसी त्यागेर रकम फिर्ता लिने बीमितको प्रवृत्ति बढ्दै गएको देखाउँछ।

यद्यपि, समयमा बीमाशुल्क नबुझाएका कारण व्यतीत हुने बीमालेखको संख्यामा भने सुधार देखिएको छ। प्राधिकरणका अनुसार असोज मसान्तसम्म १० लाख १६ हजार ७१२ वटा बीमालेख व्यतीत भएका छन्। गत आर्थिक वर्षको सोही अवधिमा यस्तो संख्या १२ लाख २० हजार ५४८ थियो। यसरी एक वर्षको अवधिमा व्यतीत हुने बीमालेखको संख्या १६.७० प्रतिशतले घटेको छ।

व्यतीत बीमालेखको रकममा पनि सामान्य गिरावट आएको छ। गत आर्थिक वर्षको असोज मसान्तसम्म ३६ अर्ब ७८ करोड ६७ लाख रुपैयाँ बराबरका बीमालेख व्यतीत भएकामा चालु आर्थिक वर्षको सोही अवधिमा उक्त रकम घटेर ३६ अर्ब १३ करोड १८ लाख रुपैयाँमा झरेको छ। यो गत वर्षको तुलनामा १.७८ प्रतिशतको कमी हो।

तथ्यांकले बीमालेखलाई निरन्तरता दिने प्रवृत्तिमा सुधार देखिए पनि अवधि पूरा नहुँदै बीमा त्याग्ने क्रम चुनौतीका रूपमा रहेको संकेत गरेको छ। बीमितको कमजोर आर्थिक अवस्था, बीमालेखका सर्त तथा सुविधाबारे पर्याप्त जानकारी नहुनु र उचित परामर्शको अभावलगायत कारणले सरेन्डर बढ्न सक्ने देखिन्छ।

बीमा क्षेत्रको दिगो विकासका लागि बीमितलाई बीमालेख खरिद गर्नुअघि नै यसको अवधि, शुल्क, प्रतिफल र सरेन्डर गर्दा हुने आर्थिक नोक्सानीबारे स्पष्ट जानकारी दिनु आवश्यक देखिन्छ।