तीन दशक बैंकिङ क्षेत्रमा बिताएका थापा बीमा प्राधिकरणको नेतृत्वमा

काठमाडौं । नेपाल बीमा प्राधिकरणका नवनियुक्त अध्यक्ष राजन विक्रम थापाले पदभार ग्रहण गरेका छन्। सरकारले मंगलबार बसेको मन्त्रिपरिषद् बैठकबाट थापालाई प्राधिकरणको अध्यक्षमा नियुक्त गर्ने निर्णय गरेको थियो।

थापालाई बुधबार अर्थ मन्त्रालयमा आयोजित कार्यक्रममा अर्थमन्त्री डा. स्वर्णिम वाग्लेले पद तथा गोपनीयताको शपथ गराएका थिए। शपथ ग्रहणपछि अर्थमन्त्री वाग्लेले बीमा क्षेत्रको विकास, विस्तार र सुधारका लागि निडर तथा निर्धक्क भएर काम गर्न नवनियुक्त अध्यक्षलाई निर्देशन दिएका थिए।

नेपाल राष्ट्र बैंकका कार्यकारी निर्देशक रहेका थापाले करिब तीन दशक बैंकिङ क्षेत्रमा बिताएका छन्। उनी पछिल्लो समय राष्ट्र बैंकको लघुवित्त संस्था सुपरिवेक्षण विभागमा कार्यरत थिए। आगामी चैतमा ३० वर्षे सेवा अवधिका कारण अवकाश पाउन लागेका थापा अब बीमा क्षेत्रको नियामक निकायको नेतृत्वमा पुगेका हुन्।

थापासँग वित्तीय संस्था तथा बैंकको सुपरिवेक्षण, नियमन, जोखिम व्यवस्थापन र संस्थागत सुशासनका क्षेत्रमा लामो अनुभव छ। उनले राष्ट्रिय जीवन बीमा कम्पनीको सञ्चालक तथा लगानी समितिको संयोजकका रूपमा समेत काम गरिसकेका छन्। त्यस्तै, निक्षेप तथा कर्जा सुरक्षण कोषको सञ्चालक समिति सदस्य र लगानी समितिको संयोजकको जिम्मेवारी पनि सम्हालेका थिए।

व्यवस्थापन, अर्थशास्त्र र कानुन विषयमा उच्च शिक्षा हासिल गरेका थापाले व्यवस्थापनमा एमफिल तथा भारतको सिंघानिया विश्वविद्यालयबाट विद्यावारिधि (पीएचडी) गरेका छन्। बैंकिङ तथा व्यवस्थापनसम्बन्धी पुस्तक लेखन र अनुसन्धानमा सक्रिय उनले सयभन्दा बढी अनुसन्धानमूलक लेखसमेत प्रकाशित गरेका छन्।