प्रकाश सपुतको शब्द–संगीतमा ‘लालीबजार’ को गीत सार्वजनिक

काठमाडौं । आगामी लालीबजार को तेस्रो गीत ‘मै राम्री छु त नी’ को छोटो अंश सार्वजनिक गरिएको छ। फिल्म १८ वैशाखदेखि प्रदर्शनमा आउने तयारीमा छ।

निर्माता कम्पनी **षट्कोण आट्र्स**को युट्युब च्यानलमार्फत सार्वजनिक गरिएको गीतमा **दीपिका बयम्बू मगर**ले स्वर दिएकी छिन्। कोरसमा रन्जिता विश्वकर्मा, बिन्दु बिसी, सुनिता सुनार, मनोज बिक र गोविन्द अनेक रहेका छन्। गीतमा **प्रकाश सपुत**को शब्द तथा सङ्गीत छ।

गीतमा स्वस्तिमा खड्का, रवीन्द्रसिंह बानियाँ, मुकुन्द श्रेष्ठ र जानकी कडायत लगायत कलाकार फिचर्ड छन्। गीतको नृत्य निर्देशन **प्रदीप लामा**ले गरेका हुन्।

गीतमा नारी सुन्दरताको बयान गरिएको छ। सार्वजनिक अंशलाई टिकटक, रिल्स र युट्युब शट्समा प्रयोग गर्न थालिएको बताइएको छ भने गीतको पूर्ण संस्करण भने फिल्म हलमै हेर्न पाइने जनाइएको छ।

फिल्म आमा–छोरीको कथामा आधारित रहेको छ। साथै बादी समुदायमा देखिने नाथिया जस्ता कुप्रथाविरुद्धको विषय पनि ट्रेलरमा समेटिएको छ। छोरीको सुरक्षाका लागि आमाले गर्ने सङ्घर्षलाई फिल्ममा देखाइएको छ, जसमा स्वस्तिमा खड्का आमाको भूमिकामा देखिएकी छिन्।

षट्कोण आट्र्सले यसअघि जात्रा, जात्रै जात्रा, महापुरुष र महाजात्रा जस्ता सफल फिल्म निर्माण गरिसकेको छ।

फिल्मको निर्देशन यम थापाले गरेका हुन्।