पाँचपोखरी थाङपालमा धानबाली पकेट विकास कार्यक्रम प्रभावकारी, कृषकलाई ट्याक्टर वितरण

सिन्धुपाल्चोक। पाँचपोखरी थाङपाल गाउँपालिकाले कृषि उत्पादन वृद्धि र किसानको आयस्तर सुधार गर्ने उद्देश्यले सञ्चालन गरेको “एक वडा एक पकेट विकास कार्यक्रम” अन्तर्गत वडा नं. ८ मा धानबाली पकेट विकास कार्यक्रम प्रभावकारी रूपमा कार्यान्वयन भइरहेको छ।
गाउँपालिकाको कार्यपालिकाले मिति २०८२ साल पुस २१ गते गरेको निर्णयअनुसार वडा नं. ८ लाई धानबाली पकेट क्षेत्रको रूपमा छनोट गरिएको हो। उक्त कार्यक्रमअन्तर्गत ३५ जना कृषक प्रत्यक्ष रूपमा लाभान्वित भएका छन् भने ५० प्रतिशत लागत साझेदारीमा कृषि सामग्री वितरण गरिएको छ। कार्यक्रममा गाउँपालिकाकी उपाध्यक्ष सुनिता अधिकारीको समेत प्रत्यक्ष संलग्नता रहेको थियो।
यसै क्रममा कृषकलाई आधुनिक कृषि उपकरण अन्तर्गत ट्याक्टर वितरण गरिएको छ। ट्याक्टर वितरणसँगै खेत जोत्न, रोपाइँ तयारी गर्न र समयमै खेती सञ्चालन गर्न सहज भएको कृषकहरूको भनाइ छ। यसले श्रम लागत घटाउने र उत्पादन क्षमता बढाउने अपेक्षा गरिएको छ।
गाउँपालिकाका कृषि शाखा प्रमुख नीमराज गिरीका अनुसार कार्यक्रमले कृषिमा आधुनिकीकरण ल्याउन महत्वपूर्ण भूमिका खेलेको छ।
“ट्याक्टर जस्ता उपकरण वितरणले कृषकलाई समय र श्रम बचत गर्न मद्दत पुगेको छ, जसले उत्पादन वृद्धि गर्न सहयोग पुर्‍याएको छ,” उनले बताए।
कार्यक्रममार्फत उन्नत बीउ, प्रविधि र आधुनिक उपकरणको प्रयोग बढाइएकोले धान उत्पादनमा सकारात्मक प्रभाव देखिने अपेक्षा गरिएको छ। कृषकहरू व्यावसायिक खेतीतर्फ आकर्षित भइरहेका छन् भने स्थानीय स्तरमै कृषि आधुनिकीकरणको सुरुवात भएको देखिन्छ।
गाउँपालिकाले यस कार्यक्रमलाई निरन्तरता दिने निर्णय गरेको छ। साथै पाँचपोखरी थाङपाल गाउँपालिकाका सबै ८ वटै वडामा पकेट विकास कार्यक्रम सञ्चालनमा रहेको र आगामी दिनमा अझ प्रभावकारी रूपमा विस्तार गरिने योजना रहेको जनाएको छ।
स्थानीय तहको यस्तो पहलले कृषिलाई आधुनिक, व्यावसायिक र दिगो बनाउँदै ग्रामीण अर्थतन्त्र सुदृढ पार्ने अपेक्षा गरिएको छ।