२० चैत्र २०८१, बिहीबार १४:०४
काठमाडौं, २१ चैत । जनता समाजवादी पार्टी (जसपा) नेपालका अध्यक्ष उपेन्द्र यादवले वर्तमान सरकार सबै क्षेत्रमा निकै कमजोर र असफल भइसकेको बताएका छन् । आज (बिहीबार) संघीय लोकतान्त्रिक मोर्चाको कार्यक्रमलाई सम्बोधन गर्दै उनले सरकारले कुनै पनि प्रतिवद्धता पूरा नगरेको र सबै क्षेत्रमा कमजोर र असफल साबित भइसकेको बताएका हुन् । सरकारले सुशासन दिन नसकेको, आर्थिक सुधार नभएको र भ्रष्टाचारी र विचौलियाको बिगबिगी नै रहेको र जनता आक्रोशित अवस्थामा रहेको उनले बताए ।
‘अहिलेको सरकार बन्नेबित्तिकै केही प्रतिवद्धताहरु गरिएको थियो । सुशासन दिने, भ्रष्टाचार नियन्त्रण गरी आर्थिक सुधार गर्ने, संविधान संशोधन गर्ने र राजनीतिक स्थिरता दिएर मुलुकलाई अगाडि बढाउने । आज झण्डै ९ महिना वितिसकेपनि न सुशासन, न भ्रष्छटाचारको अन्त्य, न आर्थिक सुधार । संविधान संशोधन गर्छु भनेर आएका प्रधानमन्त्रीले ०८७ मा संशोधन गर्ने भन्नुभयो । सबै क्षत्रमा असफल भइसकेको कारण सरकार कमजोर छ । भ्रष्टाचार बढिरहेको छ, लुटतन्त्र र विचौलिया तन्त्रको विगविगी छ । जनता आक्रोशित छन्,’– उनले भने ।
साथै, प्रतिनिधि सभामा दुई तिहाइ बहुमत भएरमात्रै सरकार बलियो नहुने कुरा अहिले आएर पुष्टि भएको उनले बताए । बंगलादेशको दुई तिहाइको सरकार र श्रीलङ्काको सरकार पनि गिरेको बताउँदै उनले भने, ‘प्रतिनिधि सभामा दुई तिहाइ बहुमतको बलियो सरकार, पहिलो र दोस्रो पार्टी मिलेर बनेको सरकार संख्याले बोलियो हुँदोरहेन छ । बंगलादेशमा दुई तिहाइको सरकार कता गयो गयो ? जनताहरु उठेपछि । त्यसैगरी श्रीलङ्कामा ठूलो बहुमतको सरकार भाग्दाखेरी धन्न कट्टु सम्हाल्न पायो । सरकार त्यो बलियो हो– जसले संघीय लोकतान्त्रिक गणतन्त्रलाई कार्यान्वयन र रक्षा गर्न सक्छ । सरकार त्यो बलियो हुन्छ, जसले मुलुकको आर्थिक समस्या समाधान गरी गरिबीको समस्या हल गर्दै सबै नागरिकलाई शिक्षा, स्वास्थ्य र रोजगारीको समस्या हल गर्न सकोस् ।’
साथै, प्रतिगामी शक्तिहरु संघीय लोकतान्त्रिक गणतन्त्र सिध्याउन लागिपरेको पनि उनले बताए । यस अवस्थामा संघीय लोकतान्त्रिक गणतन्त्रलाई रक्षा गर्ने, सुशासनका प्रत्याभूति गराउने, संघीय लोकतान्त्रिक गणतन्त्रको रक्षाका लागि संघीय लोकतान्त्रिक मोर्चा गठन भएको उनले बताए । मोर्चाले यथास्थितिवादी शक्तिहरुलाई धक्का दिँदै अग्रगमनतिर अगाडि जाने उनको दाबी छ ।
