रुपक कोइराला

मेलम्ची, सिन्धुपाल्चोक – सामुदायिक मेलमिलाप सम्बन्धी दुई दिने पुनर्ताजगी तालिम मेलम्चीमा सुरु भएको छ। मेलम्ची नगरपालिकाको आयोजना तथा न्यायिक समितिको संयोजनमा सुरु भएको तालिमले मेलमिलापकर्ताहरूलाई थप दक्ष बनाउने लक्ष्य लिएको छ।

तालिमको उद्घाटन गर्दै मेलम्ची नगरपालिका उपप्रमुख तथा न्यायिक समिति संयोजक उमा प्रधानले नगरपालिकाले हरेक वर्ष यस्ता तालिम सञ्चालन गर्ने गरेको बताइन्। मेलमिलापकर्ताहरूलाई समयअनुसार अद्यावधिक गराउँदै लैजानु नगरपालिकाको उद्देश्य रहेको उनले स्पष्ट पारिन्। साथै, मेलमिलाप प्रक्रियालाई प्रभावकारी बनाउनका लागि नगरपालिकाले केही बजेटसमेत विनियोजन गरेको जानकारी दिँदै मेलमिलापकर्ताहरूलाई अझ सक्रिय रहन आग्रह गरिन्।

तालिममा मेलमिलाप सहजीकरणका सीप, लिखत मस्यौदा अभ्यास तथा मेलमिलाप सत्र सञ्चालनका विविध पक्षबारे प्रशिक्षण प्रदान गरिनेछ। सिन्धुपाल्चोक बारका सदस्य एवं मेलमिलाप प्रशिक्षक उद्धवप्रसाद अधिकारीले सहभागीहरूलाई आवश्यक ज्ञान र सीप प्रदान गर्ने बताए।

कार्यक्रममा मेलम्ची नगरपालिकाभित्रका सूचीबद्ध मेलमिलापकर्ताहरू सहभागी छन्। न्यायिक समितिका सहजकर्ता अस्मिता ढकाल अर्यालका अनुसार तालिमले मेलमिलापकर्ताहरूलाई व्यवहारिक ज्ञान प्रदान गर्न मद्दत गर्नेछ। त्यस्तै, न्यायिक समिति सदस्य सरिता पराजुलीले तालिमबारे विस्तृत जानकारी गराइन्। कार्यक्रममा जिल्ला मेलमिलाप समाजका पूर्व अध्यक्ष हरिप्रसाद धिताल लगायतका व्यक्तित्वहरूले शुभकामना व्यक्त गरेका थिए।

मेलमिलाप प्रक्रियामा स्थानीय सरकारको सहकार्य

तालिमका दौरान स्थानीय सरकारसँग समन्वय गर्दै मेलमिलापकर्ताहरूले गरिरहेका योगदानको चर्चा गरियो। स्थानीय सरकारलाई सहयोग गर्दै मेलमिलापकर्ताहरूले समुदायमा शान्ति स्थापनामा भूमिका खेल्ने भएकाले उनीहरूको क्षमता अभिवृद्धि गर्न यस्ता तालिम महत्त्वपूर्ण हुने प्रशिक्षकहरूको भनाइ छ।

मेलम्ची नगरपालिकाको पहलमा सञ्चालन भएको यो तालिमले स्थानीय स्तरमा विवाद समाधान प्रक्रियालाई व्यवस्थित बनाउँदै मेलमिलाप प्रक्रियालाई प्रभावकारी बनाउन योगदान दिने विश्वास गरिएको छ।