काठमाडौं, २०८१ चैत १९

ईन्द्रावती गाउँपालिका, सिन्धुपाल्चोकका प्रमुख झम्कनाथ नेपालसहितका प्रतिनिधिहरूले राष्ट्रिय योजना आयोगका माननीय उपाध्यक्ष प्रा. डा. शिवराज अधिकारीलाई भेट गरी आगामी आर्थिक वर्षका लागि प्रस्तावित संघीय समपूरक र विशेष अनुदानका सबै योजनाहरू बजेटमा समेट्न आग्रह गरेका छन्।

राष्ट्रिय योजना आयोगका उपाध्यक्ष अधिकारीले पालिका प्रतिनिधिहरूसँगको भेटमा आश्वासन दिँदै भने, “तपाईंहरूलाई खुसी पार्नकै लागि यहाँ छु- पक्कै सबै समेट्न सक्दाे प्रयास गर्नेछु।”

यस भेटघाटबाट ईन्द्रावती गाउँपालिकाका प्रतिनिधिहरू उत्साहित भएका छन्। उनीहरूले भने, “यो खुसी आगामी आर्थिक वर्षको बजेट वक्तव्यपछि पनि कायम रहनेमा हामी आशावादी छौं।”

यस वर्षका लागि ईन्द्रावती गाउँपालिकाबाट संघीय समपूरक योजनामा मुख्य तीनवटा सडक, विशेष अनुदान योजनामा दुई सिँचाइ आयोजना तथा उत्पीडित जाति र समुदाय लक्षित एक योजना प्रस्ताव गरिएको छ।

गाउँपालिका प्रतिनिधिहरूले ती सबै योजनाहरू बजेटमा समेटिने विश्वास व्यक्त गरेका छन्।

यसैबीच, आज दिउँसो ईन्द्रावती–५ वडा कार्यालयमा विशेष छलफल कार्यक्रम आयोजना गरिने जानकारी गराइएको छ।