काठमाडौं । पूर्वप्रधानमन्त्री डा. बाबुराम भट्टराईले मुलुक विभिन्न राजनीतिक, आर्थिक तथा सामाजिक समस्याका कारण गम्भीर संकटतर्फ उन्मुख भइरहेको बताएका छन् ।
केही महिनाअघि राष्ट्रिय स्वतन्त्र पार्टी (रास्वपा)को चुनावी सफलतालाई नेपाली इतिहासमा नयाँ क्रान्तिको कडीका रूपमा व्याख्या गरेका भट्टराईले अहिले देशको अवस्थाप्रति चिन्ता व्यक्त गरेका हुन् ।
उनले सामाजिक सञ्जालमार्फत देशमा बढ्दो भूराजनीतिक चलखेल, सत्तापक्ष र प्रतिपक्षभित्र चर्किंदो आन्तरिक द्वन्द्व तथा न्यायालय, प्रशासन र प्रहरीजस्ता राज्यका प्रमुख अंगमा देखिएको अस्तव्यस्तताले संकटको संकेत गरिरहेको उल्लेख गरेका छन् ।
त्यस्तै, अर्थतन्त्र निरन्तर ओरालो लाग्नु, प्राकृतिक विपत्तिको भार बढ्दै जानु, युवाहरू विदेश पलायन हुनु तथा सञ्चार क्षेत्र र नागरिक वृत्तमा निराशा चुलिनुले मुलुकको अवस्था थप चुनौतीपूर्ण बनेको उनको भनाइ छ ।
भट्टराईले अब कुनै पनि बहानामा देशले थप अस्थिरता र उथलपुथल थेग्न नसक्ने भन्दै सबैलाई आ–आफ्नो क्षेत्रबाट गम्भीर बन्न आग्रह गरेका छन् ।
यसअघि चितवनमा आयोजित रास्वपाको महाधिवेशनमा सहभागी हुँदै भट्टराईले पार्टीको चुनावी सफलतालाई जनताको मन जितेर र आधुनिक प्रविधिको प्रयोगमार्फत हासिल गरिएको ऐतिहासिक उपलब्धि भन्दै प्रशंसा गरेका थिए । उनले त्यसलाई नेपाली इतिहासमा नयाँ क्रान्तिको कडीका रूपमा लिनुपर्ने धारणा राखेका थिए ।
त्यसैगरी, पाँच दिनअघि मात्रै उनले सामाजिक सञ्जालमार्फत वर्तमान सरकारलाई आफ्नो पूरा कार्यकाल काम गर्न दिनुपर्ने बताएका थिए । तर, अहिले मुलुक गम्भीर संकटतर्फ अघि बढिरहेको भन्दै उनले व्यक्त गरेको चिन्ताले उनको पछिल्लो राजनीतिक धारणाबारे चर्चा सुरु भएको छ ।
