कोशी प्रदेशका प्रदेश प्रमुख परशुराम खापुङले आज एक समारोहबीच कोशी प्रदेशका नवनियुक्त मन्त्रीहरुलाई पद तथा गोपनीयताको सपथ ग्रहण गराउनुभएको छ ।
मुख्यमन्त्री हिक्मतकुमार कार्कीको नेतृत्वमा २०८१ वैशाख २७ गते गठित मौजुदा मन्त्रिपरिषद्मा नेपालको संविधानको धारा १६८ को उपधारा (९) बमोजिम नियुक्त, हेरफेर र कार्यविभाजन हुने गरी आवश्यक व्यवस्थाका लागि भएको सिफारिसअनुसार मन्त्री र राज्य मन्त्री नियुक्त गरिएको हो ।
प्रदेश प्रमुख खापुङ समक्ष खिनु लङवा लिम्बूले पर्यटन, वन तथा वातावरण, जीवन आचार्यले भौतिक पूर्वाधार, गोम्बू शेर्पाले आन्तरिक मामिला तथा कानुन, गीता तिम्सिनाले सामाजिक तथा सपना दर्जीले भौतिक पूर्वाधार विकासमन्त्रीको सपथ लिनुभएको हो । यस्तै सपना दर्जी परियारले मुख्यमन्त्री कार्कीबाट भौतिक पूर्वाधार विकास राज्यमन्त्रीको सपथ लिनुभयो ।
मकवानपुर । बागमती प्रदेशमा नयाँ सरकार गठनको प्रक्रिया सुरु भएको छ । प्रदेश प्रमुख दीपकप्रसाद देवकोटाले नयाँ मुख्यमन्त्री नियुक्तिका लागि यही भदौ ४ गते बिहीबार अपराह्न ४ बजेसम्म दाबी पेस गर्न आह्वान गर्नुभएको छ ।
प्रदेश प्रमुख देवकोटाले सोमबार विज्ञप्ति जारी गर्दै नेपालको संविधानबमोजिम प्रदेशसभामा प्रतिनिधित्व गर्ने दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई मुख्यमन्त्री पदमा नियुक्तिका लागि दाबी पेस गर्न आह्वान गर्नुभएको हो ।
यसअघि बागमती प्रदेशका मुख्यमन्त्री इन्द्रबहादुर बानियाँले सोमबार नै पदबाट राजीनामा दिनुभएको थियो । नयाँ सरकार गठनका लागि आवश्यक बहुमत जुट्ने अवस्था नदेखिएपछि बानियाँले प्रदेशसभा बैठकमा राजीनामाको घोषणा गर्दै प्रदेश प्रमुखसमक्ष राजीनामा पेस गर्नुभएको हो ।
गत साउन ६ गते नेकपा ९एमाले०ले प्रदेश सरकारलाई दिएको समर्थन फिर्ता लिएपछि बानियाँ नेतृत्वको सरकार अल्पमतमा परेको थियो ।
प्रदेश प्रमुखको आह्वानअनुसार अब बहुमत जुटाउन सक्ने प्रदेशसभा सदस्यले सम्बन्धित दलहरूको समर्थनसहित मुख्यमन्त्री नियुक्तिका लागि दाबी पेस गर्नुपर्नेछ । दाबी पेस भएपछि संविधानअनुसार नयाँ सरकार गठनको प्रक्रिया अघि बढ्नेछ ।
काठमाडौँ — बैंकिङ प्रणालीमा उच्च तरलता कायम रहेपछि वाणिज्य बैंकहरूले भदौ महिनाका लागि निक्षेपको ब्याजदर थप घटाएका छन्। नेपालका २० वटा वाणिज्य बैंकहरूले सार्वजनिक गरेको नयाँ ब्याजदर अनुसार साउनको तुलनामा भदौमा व्यक्तिगत तथा संस्थागत दुवै तर्फको औसत ब्याजदर घटेको छ।
भदौमा व्यक्तिगत निक्षेपतर्फको औसत अधिकतम ब्याजदर साउनको ४.१६७५ प्रतिशतबाट ०.०३१५ प्रतिशतविन्दुले घटेर ४.१३६ प्रतिशत कायम भएको छ। त्यसैगरी, संस्थागत निक्षेपको औसत ब्याजदर पनि ३.११६ प्रतिशतबाट घटेर ३.०८१ प्रतिशतमा झरेको छ।
यी हुन् ब्याजदर घटाउने ५ बैंक
भदौ महिनाका लागि ५ वटा बैंकहरूले ब्याजदरमा कटौती गरेका छन्:
सिद्धार्थ बैंक: व्यक्तिगततर्फ ०.२९ प्रतिशत र संस्थागततर्फ ०.२ प्रतिशत घटेर नयाँ दर क्रमशः ३.७६ प्रतिशत र ३.०५ प्रतिशत कायम भएको छ।
नेपाल बैंक: व्यक्तिगतमा ०.१ प्रतिशत र संस्थागतमा ०.५ प्रतिशत घटाएर क्रमशः ४.१५ प्रतिशत र ३.५ प्रतिशत कायम गरिएको छ।
सिटिजन्स बैंक: व्यक्तिगत ब्याजदर ३.८५ प्रतिशत कायम।
कुमारी बैंक: व्यक्तिगत ब्याजदर ३.७६ प्रतिशत कायम।
स्ट्याण्डर्ड चार्टर्ड बैंक: व्यक्तिगत ब्याजदर ३.८ प्रतिशत कायम।
१५ बैंकको ब्याजदर स्थिर
नबिल बैंक र प्रभु बैंकले अधिकतम ४.५५ प्रतिशत व्यक्तिगत ब्याजदरसहित शीर्ष स्थान ओगटेका छन्। नेपाल इन्भेष्टमेन्ट मेगा, एनएमबि, सानिमा, माछापुच्छ्रे, राष्ट्रिय वाणिज्य, र ग्लोबल आइएमई बैंकसहित १५ वटा बैंकहरूले भने साउन महिनाकै ब्याजदरलाई निरन्तरता दिएका छन्।
कर्जाको मागमा आएको सुस्तता र बैंकहरूमा लगानीयोग्य रकम थुप्रिने क्रम जारी रहेकाले निक्षेपको लागत घटाउन बैंकहरूले ब्याजदर घटाउने रणनीतिलाई नै निरन्तरता दिएका हुन्।
शिक्षा तथा खेलकुद मन्त्रालयको आयोजनामा प्रस्तावित शिक्षा ऐन निर्माणअघि शिक्षा क्षेत्रका सरोकारवालासँग प्रत्यक्ष संवाद गर्ने उद्देश्यले सुरु गरिएको ‘शिक्षा संवाद’ कार्यक्रम विराटनगरमा सम्पन्न भएको छ।
आदर्श माध्यमिक विद्यालय, विराटनगरमा आयोजित कार्यक्रममा स्थानीय विद्यालयका प्रधानाध्यापक, शिक्षक, विद्यार्थी, अभिभावक लगायत शिक्षा क्षेत्रका विभिन्न 
सरोकारवालाको सहभागिता रहेको थियो।
कार्यक्रममा शिक्षाविद् डा. विद्यानाथ कोइराला, शिक्षा अभियन्ता अभिषेक घिमिरे, प्रधानाध्यापक एसोसिएसन नेपालका अध्यक्ष सुदाम गौतम तथा शिक्षा मन्त्रालयका सहसचिव एवं विद्यालय शिक्षा महाशाखाका प्रमुख शिव सापकोटा लगायतको सहभागिता रहेको थियो।
कार्यक्रममा शिक्षामन्त्रीका सल्लाहकार शैलेन्द्र झाले शिक्षा नीति दीर्घकालीन प्रभाव पार्ने विषय भएकाले कम्तीमा २५–३० वर्षसम्म काम गर्ने गरी दूरदर्शी शिक्षा नीति निर्माण गर्नुपर्ने बताउनुभयो।
उहाँले शिक्षा ऐन निर्माणअघि नै देशभरका शिक्षा सरोकारवालाको आवाज सुन्न आवश्यक रहेकाले सातै प्रदेशमा पुगेर स्थानीय सरोकारवालासँग संवाद सुरु गरिएको बताउनुभयो।
विराटनगरबाट सुरु भएको ‘शिक्षा संवाद’ अभियानको दोस्रो दिन आज जनकपुरमा कार्यक्रम हुँदैछ। अभियानअन्तर्गत सातै प्रदेशमा पुगेर शिक्षक, विद्यार्थी, प्रधानाध्यापक, अभिभावक, स्थानीय तह तथा शिक्षा क्षेत्रका अन्य सरोकारवालासँग प्रत्यक्ष संवाद गरिनेछ।
uकाठमाडौँ। महिलाहरूलाई चुलोचौकाको घरायसी दायराबाट बाहिर निकालेर अन्तर्राष्ट्रिय खेल मैदानसम्म पुर्याउने उद्देश्यका साथ क्याच एन्ड सर्भ बल नेपालको प्रथम राष्ट्रिय भेला तथा मनास्लु महिला क्षमता विकास केन्द्रको प्रथम वार्षिक साधारण सभा–२०८३ सम्पन्न भएको छ।
‘खेलमा समानता र स्वस्थ जीवनका लागि खेलकुद’ भन्ने मूल नाराका साथ साउन ३० गते राजधानी काठमाडौँमा आयोजित विशेष समारोहमा जनप्रतिनिधि, खेलकुद पदाधिकारी तथा महिला अधिकारकर्मीहरूको बाक्लो उपस्थिति रहेको थियो।
महिला सशक्तीकरण र नेतृत्व विकासको नयाँ माध्यम
कार्यक्रमलाई सम्बोधन गर्दै प्रमुख अतिथि एवं राष्ट्रिय सभा सदस्य डा. अन्जन शाक्यले खेलकुद महिलाको शारीरिक र मानसिक स्वास्थ्य सुधारका साथै आत्मविश्वास बढाउने सशक्त माध्यम भएको बताउनुभयो। नेपालमा नयाँ खेलका रूपमा प्रवेश पाएको क्याच एन्ड सर्भ बललाई देशका कुनाकाप्चासम्म पुर्याउन राज्यका सम्बन्धित निकाय र स्थानीय तहले सहयोग गर्नुपर्नेमा उहाँले जोड दिनुभयो।
त्यस्तै, विशिष्ट अतिथि काठमाडौँ महानगरपालिकाकी कार्यवाहक प्रमुख सुनिता डंगोलले महिलालाई अवसर र सहभागिता दिलाउन सके उनीहरूले खेल क्षेत्रका साथै सामाजिक र राजनीतिक नेतृत्वमा समेत उत्कृष्ट प्रदर्शन गर्न सक्ने दाबी गर्नुभयो।
जनजाति महासंघका अध्यक्ष एवं बागमती प्रदेशका पूर्वमन्त्री निमा लामाले खेलकुदलाई केवल मनोरञ्जनमा मात्र सीमित नराखी सामाजिक रूपान्तरणको औजार बनाउनुपर्ने धारणा राख्नुभयो।
इजरायलबाट भित्रिएको खेल, नेपालभर विस्तार गर्ने लक्ष्य
इजरायल तथा युरोपेली देशहरूमा अत्यन्तै लोकप्रिय रहेको यो खेल वैदेशिक रोजगारीका क्रममा इजरायल पुगेका नेपाली महिलाहरूले करिब तीन–चार वर्षअघि नेपाल भित्र्याएका हुन्।
मनास्लु महिला क्षमता विकास केन्द्रकी अध्यक्ष कादम्बरी दाना श्रेष्ठको अध्यक्षतामा सम्पन्न कार्यक्रममा संस्थाले वर्षभरि गरेका उपलब्धि र आगामी रणनीतिक योजना प्रस्तुत गरिएको थियो। कार्यक्रममा प्रशिक्षक (कोच) पेम्बा डोल्मा लामाले संस्थाको प्रगति विवरण र चुनौतीहरूबारे कार्यपत्र प्रस्तुत गर्नुभएको थियो भने कार्यक्रमको सञ्चालन निरु गुरुङले गर्नुभएको थियो।
कार्यक्रममा गोकर्णेश्वर नगरपालिकाकी कार्यवाहक प्रमुख साननानी लामा, शंखरापुरकी उपप्रमुख समिता श्रेष्ठ, जिल्ला समन्वय समिति सिन्धुपाल्चोकका निवर्तमान प्रमुख कृष्णगोपाल तामाङ तथा राष्ट्रिय खेलकुद परिषद्का निवर्तमान सदस्य सचिव टंकलाल घिसिङलगायत विभिन्न क्षेत्रका व्यक्तित्वहरूको सहभागिता रहेको थियो।
संस्थाले आगामी दिनमा यस खेललाई देशभरका स्थानीय तहसम्म पुर्याउँदै महिला सशक्तीकरणको अभियानलाई अझ व्यापक र सशक्त बनाउने प्रतिबद्धता व्यक्त गरेको छ।
नवलपुर, सिन्धुपाल्चोक — नेपाल राष्ट्रिय शिक्षक संगठन इन्द्रावती गाउँपालिका समितिको आयोजनामा माध्यमिक तहका विद्यार्थीहरूबीच पालिकास्तरीय डिजिटल हाजिरीजवाफ प्रतियोगिता सम्पन्न भएको छ। शनिबार (२०८३ साउन ३० गते) नवलपुरमा आयोजित उक्त प्रतियोगितामा इन्द्रावती गाउँपालिकाभित्र सञ्चालित कक्षा ९ र १० का सबै १२ वटा माध्यमिक विद्यालयका टोलीहरूले उत्साहजनक सहभागिता जनाएका थिए।
प्रविधिमैत्री वातावरणमा सम्पन्न तीव्र प्रतिस्पर्धाका बीच नवलपुर माध्यमिक विद्यालयले ८५ अंक ल्याएर प्रथम स्थान हासिल गर्न सफल भएको छ। त्यसैगरी, ऐसेलुखर्क माध्यमिक विद्यालयले ८० अंक प्राप्त गर्दै द्वितीय र राजेश्वरी माध्यमिक विद्यालयले ६५ अंकसहित तृतीय स्थान हासिल गरेका छन्।
विद्यार्थीहरूको ज्ञान, सिर्जनशीलता र प्रतिस्पर्धात्मक क्षमतालाई डिजिटल प्रविधिसँग जोडेर अभिवृद्धि गर्ने उद्देश्यका साथ प्रतियोगिता सञ्चालन गरिएको आयोजकले जनाएको छ। कार्यक्रमका सहभागी तथा विजेता विद्यालयहरूलाई आयोजकका तर्फबाट बधाई तथा शुभकामना व्यक्त गरिएको छ।
नेपाल राष्ट्रिय शिक्षक संगठन इन्द्रावती गाउँपालिका समितिका अध्यक्ष विष्णुबहादुर थापाको अध्यक्षतामा कार्यक्रम सम्पन्न भएको थियो। सो समारोहमा इन्द्रावती गाउँपालिकाका अध्यक्ष झम्कनाथ नेपाल प्रमुख अतिथि तथा संगठनका वागमती प्रदेश समिति सदस्य शारदाप्रसाद सापकोटा विशेष अतिथिका रूपमा सहभागी हुनुहुन्थ्यो।
काठमाडौँ — सुस्त आर्थिक गतिविधि र बजारको उतारचढावका बीच गत आर्थिक वर्ष २०८२/८३ मा नेपालका वाणिज्य बैंकहरूले उल्लेख्य वित्तीय सुधार गरेका छन्। सञ्चालनमा रहेका २० वटा वाणिज्य बैंकहरूको अपरिष्कृत वित्तीय विवरण अनुसार समग्र बैंकिङ क्षेत्रको नाफा अघिल्लो वर्षको तुलनामा ३२.२७ प्रतिशत (रु १७ अर्ब ४ करोड ८५ लाख) ले बढेर रु ६९ अर्ब ८६ करोड ६० लाख पुगेको छ। अघिल्लो आर्थिक वर्ष २०८१/८२ मा बैंकहरूको कुल खुद नाफा रु ५२ अर्ब ८१ करोड ७५ लाखमा सीमित थियो।असार महिनामा उपत्यका लगायत सहरी क्षेत्रमा बढेको घरजग्गा कारोबार, राष्ट्र बैंकले ब्याज असुलीका लागि दिएको अतिरिक्त १५ दिनको सुविधा र खराब ऋण व्यवस्थापनका प्रयासहरूले बैंकिङ क्षेत्रलाई लयमा फर्काउन मद्दत पुर्याएका हुन्।खुद नाफा र वृद्धिदरको प्रमुख परिदृश्यउच्च नाफा कमाउने शीर्ष बैंकहरूनबिल बैंक: रु ७ अर्ब ९० करोड ५७ लाख खुद नाफा कमाउँदै नबिल बैंक उद्योगमै सबैभन्दा अगाडि रहेको छ। नाफा अघिल्लो वर्षभन्दा ३३.५०% ले बढेको छ।कुमारी बैंक: ३०५.९५% को उच्च वृद्धि दरका साथ रु ७ अर्ब ३८ करोड ७१ लाख नाफा कमाउँदै कुमारी बैंकले नबिललाई कडा टक्कर दिएको छ।आक्रामक वृद्धिदर (कमब्याक)हिमालयन बैंक: अघिल्लो वर्ष सामान्य नाफामा खुम्चिएको हिमालयन बैंकले १,०४१% को कीर्तिमानी वृद्धि हासिल गर्दै नाफा रु १ अर्ब ४८ करोड ३ लाख पुर्याएको छ।एनआईसी एशिया बैंक: अघिल्लो वर्ष रु पौने चार अर्ब नोक्सानीमा रहेको एनआईसी एशियाले गत वर्ष रु १८ करोड १७ लाख नाफा कमाउँदै घाटाको खाडलबाट बाहिर निस्कन सफल भएको छ।अन्य उल्लेख्य नाफा वृद्धि गर्ने बैंकहरूसिटिजन्स बैंक: ६३.०५% वृद्धिराष्ट्रिय वाणिज्य बैंक: ६०.६८% वृद्धिनेपाल बैंक: ४६.२०% वृद्धिएनएमबी, सानिमा, प्राइम कमर्सियल र ग्लोबल आइएमई बैंक: मजबुत उपस्थिति कायम।केही ठूला बैंकहरूलाई चुनौती र प्रभु बैंक घाटामानाफाको समग्र आँकडा उत्साहजनक भए पनि केही ठूला बैंकहरूको कार्यसम्पादन भने चुनौतीपूर्ण देखिएको छ:बैंकको नामनाफामा आएको परिवर्तन (%) / स्थितिस्ट्याण्डर्ड चार्टर्ड बैंक५.३८% ले नाफा घट्योलक्ष्मी सनराइज बैंक२३.२६% ले नाफा घट्योकृषि विकास बैंक२९.५१% ले नाफा घट्योनेपाल इन्भेष्टमेन्ट मेगा बैंक (NIMB)३६.५८% ले नाफा घट्योप्रभु बैंकरु २४ करोड १२ लाख ४३ हजार खुद घाटासमग्रमा, गत आर्थिक वर्षको नतिजाले नेपाली वित्तीय क्षेत्र बिस्तारै पुरानै लयमा फर्कन थालेको सङ्केत गर्छ। यद्यपि, केही बैंकहरूमा देखिएको नाफाको संकुचन र प्रभु बैंकको घाटाले आगामी दिनमा जोखिम व्यवस्थापन र रणनीतिक सुधारको आवश्यकतालाई उजागर गरेको छ।
त्रिशूली । नुवाकोटको टोखा–छहरे सडकखण्डअन्तर्गत शिवपुरी गाउँपालिका–७ थानाभञ्ज्याङमा बस दुर्घटना हुँदा दुई तीर्थयात्रीको मृत्यु भएको छ। दुर्घटनामा तीन जना घाइते भएका छन्।
दुप्चेश्वर महादेवको दर्शनका लागि तीर्थयात्री लिएर आएको बा.प्र.०८–००१ ख ००५२ नम्बरको बस सडक छेउमा रोकिएका बेला आफैँ गुडेर दुर्घटनामा परेको प्रहरीले जनाएको छ।
दुर्घटनामा काभ्रेको बनेपा नगरपालिका–८ की ५४ वर्षीया कृष्णमाया प्रजापती (डङ्गोल) र रामेछापको खाँडादेवी गाउँपालिका–२ की ६५ वर्षीया उदयमाया खत्रीको मृत्यु भएको हो। घाइते अवस्थामा उद्धार गरी काठमाडौं पठाइएका उनीहरूको अस्पताल पुर्याएलगत्तै मृत्यु भएको प्रहरीले जनाएको छ।
दुर्घटनामा सर्लाहीको लालबन्दी नगरपालिका–९ की २५ वर्षीया सुजता पोखरेल, काभ्रेको बनेपा नगरपालिका–१० की ४२ वर्षीया शर्मिला श्रेष्ठ र दोलखाको मेलुङ गाउँपालिका–६ की ६० वर्षीया ज्ञानु श्रेष्ठ घाइते भएका छन्। उनीहरूको काठमाडौंमा उपचार भइरहेको छ।
जिल्ला ट्राफिक प्रहरी कार्यालय नुवाकोटका प्रमुख प्रहरी निरीक्षक बिनोद ढकालका अनुसार बस रोकिएपछि चालक र यात्रुहरू खाजा खान गएको समयमा बस आफैँ गुडेको थियो। अनियन्त्रित बसले अगाडि रोकिराखेको बा.प्र.०३–००१ ज ११७६ नम्बरको विद्युतीय भ्यानलाई समेत ठक्कर दिएको थियो।
ठक्करपछि बस र भ्यान सडकबाट करिब ५० मिटर तल पुगेका थिए। दुर्घटनापछि बस चालक काभ्रेको पाँचखाल नगरपालिका–७ का सीताराम आचार्यलाई प्रहरीले नियन्त्रणमा लिएको छ।
घटनाबारे थप अनुसन्धान भइरहेको प्रहरीले जनाएको छ।
काठमाडौं । नेपाली कांग्रेसका नेता डा. शशांक कोइरालाले आफू पार्टी विभाजनको पक्षमा नरहेको स्पष्ट पार्नुभएको छ।
शनिबार आयोजित संस्थापनइतर राष्ट्रिय भेलाका क्रममा सञ्चारकर्मीसँग कुरा गर्दै नेता कोइरालाले उक्त भेला नयाँ पार्टी गठनका लागि आयोजना नगरिएको बताउनुभयो। समयअनुसार पार्टी र विचारलाई परिमार्जन गर्दै लैजान यस्ता भेला आवश्यक रहेको उहाँको भनाइ छ।
आफू नयाँ पार्टी खोल्ने पक्षमा नरहेको स्पष्ट पार्दै कोइरालाले अदालतको निर्णय विपक्षमा आए पनि सबै पक्षबीच छलफल गरेर पार्टीको आगामी नीति तय गरिने बताउनुभयो।
उहाँले नेपाली कांग्रेसको आगामी महाधिवेशन सभापति शेरबहादुर देउवाकै नेतृत्वमा हुने दाबी गर्नुभयो। परिस्थिति अपेक्षाअनुसार अघि नबढे सम्बन्धित पक्षसँग थप छलफल गरेर आवश्यक निर्णय लिइने उहाँले बताउनुभयो।
वर्तमान सरकारप्रति टिप्पणी गर्दै नेता कोइरालाले बहुमत हुँदाहुँदै पनि सरकारले ठोस, नयाँ वा उल्लेखनीय काम गर्न नसकेको आरोप लगाउनुभयो। उहाँले वर्तमान सरकारलाई सामान्य ‘कामचलाउ’ सरकारको संज्ञा दिनुभयो।
कोइरालाले वर्तमान सरकार पाँच वर्ष टिक्ने वा बीचमै मध्यावधि निर्वाचनमा जाने सम्भावनालाई समेत राजनीतिमा नकार्न नसकिने बताउनुभयो।
काठमाडौं । नेपाली कांग्रेसका पूर्वसभापति शेरबहादुर देउवा समूहको भेलामा पार्टीका सबै तहका समितिदेखि महाधिवेशन प्रतिनिधिसम्म कम्तीमा एक तिहाइ महिला र कम्तीमा एक चौथाइ ३० वर्षमुनिका युवाको प्रतिनिधित्व अनिवार्य गर्न प्रस्ताव गरिएको छ।
साङ्गठनिक समितिका संयोजक उमाकान्त चौधरीले पार्टी पुनर्संरचना तथा विधान परिमार्जनसम्बन्धी प्रस्ताव प्रस्तुत गर्दै कांग्रेसलाई युवा र समावेशी चरित्रको पार्टीका रूपमा विकास गर्नुपर्नेमा जोड दिएका हुन्।
प्रस्तावमा कोटा नपुगे सम्बन्धित समिति वा प्रतिनिधित्वको सूचीले वैधता नपाउने व्यवस्था गर्नुपर्ने उल्लेख छ। पार्टीका आन्तरिक निर्वाचनमा केन्द्रका नेताहरूको प्रत्यक्ष प्रभावमा संस्थापन र इतर पक्षका प्यानल घोषणा गरी चुनाव लड्ने प्रवृत्तिले कार्यकर्ताबीच मनमुटाव बढाएको भन्दै यस्तो अभ्यासलाई निरुत्साहित गर्नुपर्ने प्रस्ताव गरिएको छ।
महाधिवेशन प्रतिनिधि बन्न लाखौँ रुपैयाँ खर्च गर्नुपर्ने अवस्थाका कारण आर्थिक रूपमा कमजोर तर निष्ठावान् कार्यकर्ता पछाडि परेको उल्लेख गर्दै आन्तरिक निर्वाचन प्रणालीलाई सुधार गर्नुपर्नेमा जोड दिइएको छ।
प्रस्तावमा महाधिवेशन तथा महासमिति सदस्यको चयन सम्बन्धित निर्वाचन क्षेत्रका सम्पूर्ण खुला सदस्यको प्रत्यक्ष मतदान र पूर्ण समावेशी पद्धतिबाट गर्नुपर्ने उल्लेख छ।
त्यस्तै, वडा तहका सभापतिका लागि कम्तीमा पाँच वर्ष, अन्य तहका सभापतिका लागि १० वर्ष र केन्द्रीय सभापतिको उम्मेदवार बन्न कम्तीमा १५ वर्ष पार्टी सदस्य भएको हुनुपर्ने व्यवस्था गर्न प्रस्ताव गरिएको छ।
कांग्रेसको टिकट वितरण प्रणालीमा समेत व्यापक सुधार आवश्यक रहेको प्रस्तावमा उल्लेख छ। सीमित शीर्ष नेताहरू सम्मिलित केन्द्रीय संसदीय बोर्डमा उम्मेदवार छनोटको अधिकार केन्द्रित हुँदा तल्लो तहको सिफारिस र जनभावनाविपरीत टिकट वितरण हुने गरेको आरोप लगाइएको छ।
हालैको निर्वाचनमा पार्टीले व्यहोरेको पराजयको प्रमुख कारणमध्ये केन्द्रीकृत र अपारदर्शी टिकट वितरण प्रणाली पनि रहेको प्रस्तावमा दाबी गरिएको छ।
उम्मेदवार छनोटका लागि ५० प्रतिशत प्राइमरी इलेक्सन र ५० प्रतिशत आन्तरिक मूल्याङ्कनको व्यवस्था गर्नुपर्ने प्रस्ताव गरिएको छ। स्थानीय तह, प्रदेश तथा संघीय संसद्का उम्मेदवार चयन गर्दा सम्बन्धित निर्वाचन क्षेत्रका पार्टी सदस्यबीच गोप्य मतदान गराउने प्रणाली विकास गर्नुपर्ने उल्लेख छ।
प्रारम्भिक निर्वाचन तथा आन्तरिक मूल्याङ्कन समितिको सिफारिसका आधारमा केन्द्रीय संसदीय बोर्डले उम्मेदवार अनुमोदन गर्ने व्यवस्था लागू गर्नुपर्ने प्रस्तावमा भनिएको छ।
प्रस्तावले पार्टीको आन्तरिक लोकतन्त्र, समावेशिता र संगठनात्मक सुधारलाई प्राथमिकतामा राख्दै कांग्रेसलाई पुनः बलियो र विधिसम्मत पार्टीका रूपमा स्थापित गर्नुपर्नेमा जोड दिएको छ। कांग्रेस आफैँभित्र कमजोर र अलमलमा परे लोकतन्त्र तथा संविधानसमेत संकटमा पर्न सक्ने चेतावनीसमेत प्रस्तावमा दिइएको छ।
