सिन्धुपाल्चोक । नेपाली कांग्रेसको १५औँ महाधिवेशनअन्तर्गत सिन्धुपाल्चोक प्रतिनिधिसभा निर्वाचन क्षेत्र नं. २ बाट दुर्गाबहादुर तामाङ (च्याङ्वा) ले केन्द्रीय महाधिवेशन प्रतिनिधि (समावेशीतर्फ) पदमा उम्मेदवारी घोषणा गरेका छन्।
इन्द्रावती गाउँपालिका–५ का पूर्ववडा अध्यक्षसमेत रहेका तामाङले कांग्रेस संगठनलाई थप समावेशी, लोकतान्त्रिक र जनमुखी बनाउने प्रतिबद्धतासहित उम्मेदवारी दिएको बताएका छन्।
उनले संगठन सुदृढीकरण, लोकतान्त्रिक मूल्य–मान्यताको रक्षा तथा समावेशी लोकतन्त्रको आधार निर्माणलाई आफ्नो मुख्य प्राथमिकता बनाएको उल्लेख गरेका छन्।
तामाङले क्षेत्र नं. २ अन्तर्गतका ४९ वटै वडाका वडा सभापति, क्षेत्रीय प्रतिनिधि, अग्रज नेतागण तथा पार्टीका शुभेच्छुकहरूसँग सहयोग र समर्थनका लागि अपिल गरेका छन्। उनले आफूलाई अमूल्य मत प्रदान गरी विजयी गराउन आग्रहसमेत गरेका छन्।
