‘टेक्नोपोलिटिक्स’को नारासहित कांग्रेस महाधिवेशनमा ई. विजय गौतम

बनेपा । नेपाली कांग्रेसको १५औँ महाधिवेशनका लागि काभ्रेपलाञ्चोक प्रतिनिधिसभा क्षेत्र नं. २ बाट ई. विजय गौतमले महाधिवेशन प्रतिनिधि पदमा उम्मेदवारी घोषणा गरेका छन्।
‘राजनीति र प्रविधि—It’s time for a TechnoPolitics’ भन्ने नारासहित उम्मेदवारी घोषणा गरेका गौतमले प्रविधि, नीति र नयाँ पुस्ताको सोचलाई पार्टी संगठनसँग जोड्ने आफ्नो उद्देश्य रहेको बताएका छन्।
प्रविधि क्षेत्रमा लामो अनुभव हासिल गरेका गौतम विश्वप्रसिद्ध प्रविधि कम्पनी एप्पलमा इन्फर्मेशन सेक्युरिटी आर्किटेक्टका रूपमा कार्यरत रहिसकेका छन्। त्यसअघि उनले क्वालकममा समेत काम गरेका थिए। नेपाल फर्किएपछि शिक्षा, गृह, सञ्चार तथा भौतिक पूर्वाधारलगायत विभिन्न मन्त्रालयअन्तर्गतका सरकारी सल्लाहकार तथा अध्ययन समितिमा समेत संलग्न भएको उनले बताएका छन्।
महाधिवेशन प्रतिनिधिका रूपमा आफ्नो उम्मेदवारीसँगै गौतमले पार्टीको विधान र संगठनात्मक संरचनामा समयसापेक्ष सुधारलाई मुख्य एजेन्डा बनाएका छन्। नेपाली कांग्रेसको मूल सिद्धान्तलाई आत्मसात् गर्दै वर्तमान विधानलाई थप व्यावहारिक, लचिलो र बदलिँदो परिस्थितिअनुकूल बनाउन महाधिवेशनको सर्वोच्च मञ्चमा स्पष्ट र निर्भीक आवाज उठाउने उनको प्रतिबद्धता छ।
पार्टीका हरेक तहमा निर्णय प्रक्रिया पारदर्शी र समावेशी बनाउँदै तल्लो तहका कार्यकर्ताको भावना प्रतिबिम्बित हुने गरी आन्तरिक लोकतन्त्रलाई संस्थागत गर्ने विषयलाई पनि उनले प्राथमिकतामा राखेका छन्।
गौतमले व्यक्तिगत वा गुटगत स्वार्थभन्दा माथि उठेर नीति, सिद्धान्त र कार्यकर्ताको मूल्याङ्कनका आधारमा पार्टी सञ्चालन गर्ने प्रणाली विकास गर्नुपर्नेमा जोड दिएका छन्। त्यसका लागि आवश्यक व्यवस्था पार्टी विधानमै स्पष्ट गर्न पहल गर्ने उनको भनाइ छ।
कठोर र जटिल संगठनात्मक संरचनाका कारण नयाँ पुस्ता तथा योग्य व्यक्तिहरू नेतृत्वमा पुग्न कठिन हुने अवस्थाको अन्त्य गर्दै युवा र नयाँ विचारलाई नेतृत्वमा ल्याउने वैधानिक बाटो खोल्नुपर्ने उनको धारणा छ।
प्रविधि र आधुनिक शासन व्यवस्थाबीचको सम्बन्धलाई जोड दिँदै गौतमले प्रविधिको प्रयोगबिना आधुनिक शासन प्रणालीको परिकल्पना अधुरो हुने बताएका छन्।
“प्रविधिबिनाको आधुनिक शासन प्रणाली निर्देशनतन्त्र हो, जहाँ ट्याक्टरको इन्जिनले प्लेन उडाउने सपना बेचिन्छ,” गौतमले भनेका छन्।
उनले कांग्रेसको महाधिवेशनलाई केवल सभा, समारोह, सहमति र निर्वाचनमा सीमित नराखी नीति, सिद्धान्त र पार्टीको दीर्घकालीन दृष्टिकोणमाथि खुला तथा जीवन्त बहस हुने मञ्चका रूपमा विकास गर्नुपर्नेमा जोड दिएका छन्।
महाधिवेशन प्रतिनिधिका रूपमा निर्वाचित भएमा प्रविधि, नीति र नयाँ पुस्ताको सोचलाई पार्टीको संगठनात्मक अभ्याससँग जोड्दै कांग्रेसलाई समयअनुकूल बनाउन आफ्नो भूमिका केन्द्रित गर्ने गौतमको भनाइ छ।