सुर्यमुखी साना किसान कृषि सहकारीको पशुधन सुरक्षण समितिको दशौं वार्षिक साधारणसभा हालै मेलम्ची–१, भोटेचौरमा सम्पन्न भएको छ। कार्यक्रममा प्रमुख अतिथि र सहकारीका अध्यक्ष मित्रलाल चौलागाईंले सदस्यहरुको सहकारी प्रति चासो अझै बढाउनु पर्नेमा जोड दिनुभयो। उहाँले भने, “कम्पनीमार्फत गरिएका बिमा भुक्तानीमा कठिनाइ रहेको छ, जसलाई सहजीकरण गर्न आवश्यक छ।”

सहकारीले विभिन्न समस्याका कारण बिमा कार्यक्रम रोक्न परेको भए पनि यसलाई अगाडि बढाउन प्रतिबद्धता व्यक्त गर्नुभयो। चौलागाईंले सदस्यहरुलाई सहुलियतपूर्ण ऋण ल्याएर लगानी गर्न आग्रह गर्दै, सहकारीमार्फत थप सुविधाहरू प्रदान गरिने जानकारी दिनुभयो।

कार्यक्रमका सभापति गोविन्दप्रसाद चौलागाईंले २०८० चैतदेखि २०८१ चैतसम्मको अवधिमा ३०० गाई र ४३२ भैंसी गरी कुल ७३२ पशुहरूको बीमा भएको जानकारी दिनुभयो। उहाँले केही समस्याकारण बाख्रा र बगुंरको बिमा रोकिएको भन्दै छिट्टै पुनः सुरु गर्न तयारी गरिएको बताउनुभयो। नेपाल सरकारद्वारा साना किसान विकास लघुवित्त वित्तीय संस्थामार्फत चैतसम्म ८१ लाख २३ हजार ८ सय रुपैयाँ बीमा भुक्तानी आउन बाँकी रहेको उल्लेख पनि गर्नुभयो।

सभामा आगामी कार्यक्रमका लागि पशु संख्या वृद्धि, सहजीकरणका कार्यक्रम सञ्चालन, गोठ सुधार, औषधोपचार पहुँच र पशु बीमा शुल्कमा सहुलियत गर्ने योजना सार्वजनिक गरिएको थियो।

कार्यक्रममा उपस्थित सदस्यहरूको भनाइ थियो कि यसले स्थानीय स्तरमा पशुपालन व्यवसायमा विश्वास र उत्साह थपेको छ। कार्यक्रमको सञ्चालन सहकारी संस्थाका प्रबन्धक गोविन्द नेपालले गर्नुभएको थियो।