काठमाडौँ । प्रमुख प्रतिपक्ष दल नेपाली कांग्रेस का सांसद भरतबहादुर खड्का ले गृहमन्त्रीमा पुनः सुदन गुरुङ लाई नियुक्त गरिएको विषयमा आपत्ति जनाउनुभएको छ।
शुक्रबारको प्रतिनिधि सभा बैठकमा बोल्दै उहाँले सम्पत्तिसम्बन्धी अभियोग लागेको तथा राष्ट्रिय मानव अधिकार आयोग ले जेनजी आन्दोलनका घटनामा दोषी ठहर गरेको व्यक्तिलाई पुनः गृहमन्त्रीको जिम्मेवारी दिइएको भन्दै असन्तुष्टि व्यक्त गर्नुभयो।
सांसद खड्काले सरकारले दोषीमाथि कारबाही गर्नुको सट्टा पुरस्कार दिने काम गरिरहेको आरोप लगाउनुभयो। सुशासनको नारा दिने सरकारले आफ्ना निकट व्यक्तिलाई जोगाउने र जिम्मेवारी प्रदान गर्ने कार्य गरिरहेको उहाँको भनाइ थियो।
उहाँले सरकारको यस्तो कदमले सुशासन, जवाफदेहिता र विधिको शासनमाथि प्रश्न उठाएको उल्लेख गर्नुभयो।
साथै सांसद खड्काले बालेन्द्र साह ले संसदमा दिएको अभिव्यक्ति संसदीय मर्यादाविपरीत रहेको दाबी गर्दै उक्त अभिव्यक्तिलाई संसदको अभिलेख (रेकर्ड) बाट हटाउनुपर्ने आफ्नो अडान पुनः दोहोर्याउनुभयो।
काठमाडौँ । हर्कराज राई ले भारतीय सीमा सुरक्षा बल (एसएसबी) ले सुस्तामा नेपाली नागरिकमाथि गरेको भनिएको हप्की-दप्कीको घटनाबारे सरकारको ध्यानाकर्षण गराउँदै तत्काल संसदलाई स्पष्ट जवाफ दिन माग गर्नुभएको छ।
शुक्रबार बसेको प्रतिनिधि सभा बैठकमा बोल्दै उहाँले उक्त घटनासम्बन्धी भिडियो सार्वजनिक भइसकेको उल्लेख गर्दै रक्षामन्त्रीले तत्काल सदनमा आएर यथार्थ जानकारी दिनुपर्ने बताउनुभयो।
अध्यक्ष राईले सीमा क्षेत्रमा नेपाली सेना किन सक्रिय रूपमा परिचालित हुन नसकेको भन्दै प्रश्न उठाउनुभयो। उहाँले नेपाली सेना सीमामा गएर अवलोकन गर्न नपाउने कुनै सन्धि वा सम्झौता भएको भए त्यसको विवरण संसदलाई उपलब्ध गराउन पनि सरकारलाई आग्रह गर्नुभयो।
उहाँले आफ्नै भूमिको रक्षा गर्न नेपाली नागरिकहरू मात्रै अग्रसर हुनुपर्ने अवस्था आउनु दुःखद भएको उल्लेख गर्दै सरकारले सीमा समस्याप्रति आवश्यक चासो नदिएको आरोप लगाउनुभयो।
संविधानले सुनिश्चित गरेको सूचनाको हकअनुसार सरकारले उक्त घटनाबारे सत्यतथ्य जानकारी संसदसमक्ष प्रस्तुत गर्नुपर्ने उहाँको भनाइ थियो।
काठमाडौँ । पूर्वअर्थमन्त्री तथा नेकपा नेता वर्षमान पुन ले अर्थमन्त्री डा. स्वर्णिम वाग्ले को अभिव्यक्तिले संसदको गरिमा र सांसदहरूको सम्मानमाथि प्रश्न उठाएको भन्दै संसदीय छानबिन समिति गठन गर्न माग गर्नुभएको छ।
शुक्रबारको प्रतिनिधि सभा बैठकमा बोल्दै उहाँले बजेटमाथिको छलफलका क्रममा अर्थमन्त्रीले सांसदहरूलाई लक्षित गर्दै दिएको अभिव्यक्ति अस्वीकार्य रहेको बताउनुभयो। सांसदहरूले उठाएका प्रश्नको जवाफ दिने क्रममा धम्कीपूर्ण शैली अपनाइनु लोकतान्त्रिक अभ्यास र संसदीय मर्यादाविपरीत भएको उहाँको भनाइ थियो।
पुनले करका दर हेरफेरसम्बन्धी विवादमा अर्थमन्त्रीले आफ्नो जिम्मेवारीबाट पन्छिन खोजेको आरोप लगाउँदै सत्यतथ्य बाहिर ल्याउन निष्पक्ष छानबिन आवश्यक रहेको बताउनुभयो। उहाँले विगतमा पनि यस्ता घटना भएको भए त्यसको समेत अनुसन्धान हुनुपर्ने धारणा राख्नुभयो।
उहाँले कुनै पनि बहानामा संसदलाई कमजोर बनाउने वा सांसदहरूको भूमिकालाई अवमूल्यन गर्ने प्रयास स्वीकार्य नहुने स्पष्ट पार्दै सम्बन्धित विषयमा संसदीय समितिमार्फत विस्तृत छानबिन गर्न सरकारसँग माग गर्नुभयो।
