काठमाडौं । आगामी लालीबजार को तेस्रो गीत ‘मै राम्री छु त नी’ को छोटो अंश सार्वजनिक गरिएको छ। फिल्म १८ वैशाखदेखि प्रदर्शनमा आउने तयारीमा छ।

निर्माता कम्पनी **षट्कोण आट्र्स**को युट्युब च्यानलमार्फत सार्वजनिक गरिएको गीतमा **दीपिका बयम्बू मगर**ले स्वर दिएकी छिन्। कोरसमा रन्जिता विश्वकर्मा, बिन्दु बिसी, सुनिता सुनार, मनोज बिक र गोविन्द अनेक रहेका छन्। गीतमा **प्रकाश सपुत**को शब्द तथा सङ्गीत छ।

गीतमा स्वस्तिमा खड्का, रवीन्द्रसिंह बानियाँ, मुकुन्द श्रेष्ठ र जानकी कडायत लगायत कलाकार फिचर्ड छन्। गीतको नृत्य निर्देशन **प्रदीप लामा**ले गरेका हुन्।

गीतमा नारी सुन्दरताको बयान गरिएको छ। सार्वजनिक अंशलाई टिकटक, रिल्स र युट्युब शट्समा प्रयोग गर्न थालिएको बताइएको छ भने गीतको पूर्ण संस्करण भने फिल्म हलमै हेर्न पाइने जनाइएको छ।

फिल्म आमा–छोरीको कथामा आधारित रहेको छ। साथै बादी समुदायमा देखिने नाथिया जस्ता कुप्रथाविरुद्धको विषय पनि ट्रेलरमा समेटिएको छ। छोरीको सुरक्षाका लागि आमाले गर्ने सङ्घर्षलाई फिल्ममा देखाइएको छ, जसमा स्वस्तिमा खड्का आमाको भूमिकामा देखिएकी छिन्।

षट्कोण आट्र्सले यसअघि जात्रा, जात्रै जात्रा, महापुरुष र महाजात्रा जस्ता सफल फिल्म निर्माण गरिसकेको छ।

फिल्मको निर्देशन यम थापाले गरेका हुन्।

३ वैशाख, काभ्रेपलाञ्चोक । शनिबार परेको वर्षाका कारण विभिन्न स्थानका डाइभर्सन बगाएपछि बीपी राजमार्ग पूर्णरूपमा अवरुद्ध भएको छ। शनिबार दिउँसो करिब ४ बजेदेखि बन्द भएको राजमार्ग तत्काल खुल्ने सम्भावना कम रहेको प्रहरीले जनाएको छ।

नेपाल प्रहरीका अनुसार रोशी खोलामा आएको बाढीले चौकीडाँडा, घुमाउने, चारसय बेँसी, गिम्दी बेँसी, नार्के, चिउरीबास, बोक्सीकुना, कालढुंगा, डालाबेशी, ठुलोढुंगा र माम्ती क्षेत्रमा बनाइएका डाइभर्सन बगाएको छ। साथै नेपालथोक र सिन्धुलीतर्फ आँपघारी क्षेत्रमा पनि डाइभर्सन क्षतिग्रस्त भएको छ।

जिल्ला प्रहरी प्रमुख कोमल शाहका अनुसार राजमार्ग अवरुद्ध भएपछि काभ्रेको मङ्गलटार, भकुण्डे, काभ्रेभञ्ज्याङ र धुलिखेल तथा सिन्धुलीको नेपालथोक र खुर्कोटमा सयौं सवारीसाधन रोकिएका थिए। आइतबार बिहानदेखि भकुण्डे, काभ्रेभञ्ज्याङ र धुलिखेलमा रोकिएका सवारी साधनलाई सुरक्षित स्थानतर्फ पठाइसकिएको छ।

मङ्गलटार क्षेत्रमा रोकिएका यात्रुहरूलाई भने रोशी खोला पारिसम्म पैदल हिँडाएर त्यहाँबाट अर्को सवारीको व्यवस्था गरी तेमालको कालधार–नारायणस्थान–भकुण्डे हुँदै धुलिखेल पठाउन थालिएको प्रहरीले जनाएको छ।

प्रहरीका अनुसार मौसममा सुधार आई सडक सुरक्षित भएको सुनिश्चित भएपछि मात्र पुनः सवारी सञ्चालन गरिनेछ। राजमार्गको अवस्थाबारे जानकारी लिनका लागि नेपाल प्रहरीको १०० र ट्राफिक प्रहरीको १०३ नम्बरमा सम्पर्क गर्न सकिने बताइएको छ।

बीपी राजमार्ग बन्द हुँदा काठमाडौंबाट पूर्वी पहाड र तराईतर्फ जाने तथा राजधानी भित्रिने सयौं सवारी साधन प्रभावित भएका छन्।

यसअघि २०८१ असोजको दोस्रो सातामा आएको भीषण बाढीले भकुण्डेदेखि नेपालथोकसम्म करिब २८ किलोमिटर सडकखण्डमा ठूलो क्षति पुर्‍याएको थियो। क्षतिग्रस्त क्षेत्रमा पुनर्निर्माण कार्य जारी रहे पनि स्थायी संरचना नबन्दा रोशी खोला किनार हुँदै अस्थायी डाइभर्सनमार्फत यातायात सञ्चालन हुँदै आएको छ। अहिले बाढीले ती डाइभर्सन बगाउँदा राजमार्ग पुनः अवरुद्ध भएको हो।

भक्तपुर । मनोहरा खोला किनारस्थित सुकुम्बासी बस्तीमा बनाइएका अनधिकृत घरटहरा हटाउने काम सुरु गरिएको छ।

बस्ती हटाउन बिहानैदेखि करिब ३०० जना नेपाल प्रहरी र ६०० सशस्त्र प्रहरी परिचालन गरिएको जिल्ला प्रहरी परिसर भक्तपुरका प्रमुख **सूर्यबहादुर खड्का**ले जानकारी दिए।

उनका अनुसार बासिन्दालाई बिहान ९ बजेसम्म आफैं घरटहरा भत्काउने समय दिइएको थियो। त्यसपछि **काठमाडौँ महानगरपालिका**को डोजरसहितको टोलीले संरचना हटाउन सुरु गरेको हो।

प्रहरीका अनुसार अधिकांश घरटहराबाट सामान सारेर खाली बनाएपछि भत्काउने काम अघि बढाइएको छ।

उक्त बस्तीमा ७७७ घरटहरा रहेको बताइएको छ। यसअघि शनिबार साँझ पनि सात वटा पक्की घर भत्काइँदा केही सुकुम्बासीले अवरोध गरेका थिए। त्यस क्रममा भएको झडपमा २२ जना सुरक्षाकर्मी घाइते भएका थिए।

काठमाडौँ । आईसीसी विश्वकप लिग टू अन्तर्गत त्रिकोणात्मक सिरिजमा नेपालले यूएईमाथि ३७ रनको जित निकालेको छ । त्रिवि क्रिकेट रंगशालामा शनिबार भएको खेलमा नेपालले टस हारेर पहिले ब्याटिङ गर्दै ४८.२ ओभरमा २०० रन बनाएको थियो ।

जवाफमा २०१ रनको लक्ष्य पछ्याएको यूएई १६३ रनमै समेटियो । नेपालका लागि उपकप्तान दीपेन्द्रसिंह ऐरीले ७५ रनको उत्कृष्ट अर्धशतकीय इनिङ खेले । बलिङतर्फ करण केसीले ४ विकेट लिए भने सोमपाल कामीले २ विकेट हात पारे । सन्दीप लामिछाने र करणले अन्तिमतिर महत्वपूर्ण विकेट लिँदै जित सुनिश्चित गरे ।

यो जितसँगै नेपालले २१ खेलमा ६ जितसहित १४ अंक जोड्दै लिग टू तालिकाको सातौँ स्थानमा यथावत् रहेको छ ।

काठमाडौं । सरकारले निजामती सेवामा राजनीतिक दलसँग आबद्ध कर्मचारी ट्रेड युनियन हटाउने प्रस्तावसहित नयाँ संघीय निजामती सेवा विधेयकको मस्यौदा तयार गरेको छ।

संघीय मामिला तथा सामान्य प्रशासन मन्त्रालयले तयार पारेको मस्यौदामा ट्रेड युनियनको सट्टा कर्मचारीका गुनासो सुन्न प्रभावकारी संयन्त्र बनाउने व्यवस्था प्रस्ताव गरिएको छ। मन्त्री प्रतिभा रावलका अनुसार निजामती कर्मचारीले राजनीतिक दल वा तिनका भ्रातृ संगठनको सदस्यता लिन नपाउने व्यवस्था गरिएको छ।

मस्यौदामा राजनीतिक गतिविधिमा संलग्न भएको प्रमाणित भए कर्मचारीलाई बर्खास्त गरी भविष्यमा सरकारी सेवाका लागि अयोग्य ठहर गर्ने प्रस्ताव गरिएको छ।

त्यस्तै, निजामती कर्मचारीको सेवा अवधि ६० वर्षसम्म रहने र सचिवको पदावधि दुई वर्ष रहने उल्लेख छ। कार्यदक्षताका आधारमा सरकारले सचिवको कार्यकाल एक वर्षसम्म थप गर्न सक्नेछ।

कर्मचारीलाई बढुवाका लागि दुर्गम क्षेत्रमा काम गरेको र स्थानीय तहको प्रमुख प्रशासकीय अधिकृत भएर सेवा दिएको हुनुपर्ने व्यवस्था पनि प्रस्ताव गरिएको छ।

मस्यौदामा अवकाशपछि दुई वर्षको ‘कुलिङ पिरियड’ कायम राखिएको छ। यस अवधिमा उच्च पदबाट अवकाश लिएका कर्मचारीले कुनै राजनीतिक वा संवैधानिक पदमा नियुक्ति पाउन नपाउने व्यवस्था गरिएको छ।

मन्त्रालयले मस्यौदा सार्वजनिक गर्दै सुधारका लागि सुझावसमेत आह्वान गरेको छ।
https://docs.google.com/document/d/1tVeQmxMLJcPi34tPVwYLJH2LrRhVlhNaMbfYfewxOhc/edit?usp=sharing

त्यस्तै, इक्विटीमा प्रतिफल पनि १०.३५ प्रतिशतबाट सुधार भई १३.१३ प्रतिशत पुग्नुले सेयरधनीको लगानीमा उचित प्रतिफल दिने बैंकको प्रयास सफल भएको देखिन्छ। बैंकले १८.५७ प्रतिशतको वार्षिकीकृत वितरणयोग्य नाफा कायम राखेकाले आगामी दिनमा लगानीकर्ताहरूले आकर्षक लाभांशको अपेक्षा गर्न सक्ने प्रशस्त आधारहरू देखिएका छन्।

बैंकको यो सफलताको जग यसको बलियो कर्जा विस्तार रणनीतिमा अडिएको छ। ८.२५ प्रतिशतको वृद्धिदरका साथ सानिमाले १ खर्ब ९८ अर्ब ६० करोड रुपैयाँ बराबरको खुद कर्जा तथा सापटी परिचालन गरेको छ।

यस्तो विस्तारलाई टेवा पुर्‍याउन बैंकले आफ्नो पूँजीगत आधारलाई समेत उत्तिकै मजबुत बनाएको छ। सोही अवधिमा बैंकले २ अर्ब रुपैयाँ बराबरको ८.२५ प्रतिशत ‘पर्पेचुअल नन-क्युमुलेटिभ’ प्रिफरेन्स सेयर जारी गरेर आफ्नो पूँजी कोषलाई थप सुदृढ तुल्याएको हो।

हाल बैंकको टियर १ पूँजी पर्याप्तता १०.०३ प्रतिशत र कुल पूँजी पर्याप्तता १३.१६ प्रतिशत रहेको छ, जसले बैंकसँग सम्भावित जोखिम वहन गर्न सक्ने पर्याप्त क्षमता रहेको पुष्टि गर्दछ।

अन्तर्राष्ट्रिय बजारको मानक र स्थानीय बजारको प्रतिस्पर्धालाई हेर्दा सानिमा बैंकले लिएको यो गन्तव्य निकै रणनीतिक देखिन्छ। बैंकिङ प्रणालीमा तरलता र ब्याजदरको उतारचढाव भइरहँदा पनि सानिमाले आफ्नो सञ्चालन मुनाफा र खुद ब्याज आम्दानीलाई स्थिर राख्दै अघि बढेको देखिन्छ।

यद्यपि खराब कर्जामा देखिएको सामान्य दबाबलाई व्यवस्थापन गर्न बैंकले अवलम्बन गर्ने आगामी रणनीतिले यसको भविष्यको यात्रा थप सुनिश्चित गर्नेछ। समग्रमा, सानिमा बैंकले चैत मसान्तसम्म हासिल गरेको यो वित्तीय प्रतिवेदनले नेपाली वित्तीय क्षेत्रमा एक परिपक्व र दरिलो खेलाडीको रूपमा आफ्नो उपस्थिति कायम राखेको छ।

समाचार:
१२ वैशाख, काठमाडौं । विश्वराज पोखरेलले आफ्नै अभिव्यक्तिका कारण उत्पन्न विवादपछि माफी मागेका छन्। राष्ट्रिय स्वतन्त्र पार्टीका सांसद पोखरेलले प्रेस विज्ञप्ति जारी गर्दै सामाजिक सञ्जालमा भाइरल भएको भिडियो वास्तविक सन्दर्भमा प्रस्तुत नभएको बताएका छन्।

उनले भिडियोमा घटनाको केही अंश मात्र काटछाँट गरेर राखिएको दाबी गर्दै विवाद सिर्जना भएकोमा खेद प्रकट गरेका छन्। साथै सार्वजनिक जीवनमा आफ्नो बोली र व्यवहार अझ संयमित हुनुपर्ने कुरा स्वीकार गरेका छन्।

ओखलढुङ्गाको खिजिदेम्बा गाउँपालिका–२ स्थित चण्डेश्वरी माध्यमिक विद्यालयका प्रधानाध्यापकलाई स्वागत गर्न नआएको भन्दै उनले आक्रोश व्यक्त गरेको भिडियो सार्वजनिक भएपछि विवाद भएको थियो।

सरकारले सिनामंगलस्थित सुकुम्वासी बस्तीमा डोजर चलाउन सुरु गरेको छ । दिउँसो साढे १ बजेबाट डोजर चलाउन सुरु गएिको हो ।

यसअघि थापाथलीस्थित सुकुम्बासी बस्तीमा डोजर चलाइएको थियो । थापाथलीको बस्ती भत्काइसकेपछि सिनामंगलमा डोजर चलाउन थालिएको हो ।

काठमाडौं । प्रधानमन्त्रीको सचिवालयले सुकुम्बासी बस्ती हटाउने क्रममा प्रभावित परिवारलाई ‘साइट’मै व्यवस्थापन र राहत उपलब्ध गराइने जनाएको छ ।

शनिबार बिहानदेखि कार्यक्षेत्रमा खटिएको टोलीले बस्ती हटाउने कामसँगै तत्कालका लागि खानाको व्यवस्था पनि गर्ने प्रधानमन्त्री बालेन्द्र शाहको सचिवालयले जारी गरेको विज्ञप्तिमा उल्लेख गरिएको छ ।

स्थानान्तरण हुने सुकुम्बासीका लागि शनिबार र आइतबार सरकारकै तर्फबाट प्याकेटमा खाना उपलब्ध गराइने जनाइएको छ ।

“पुनःस्थापनाका लागि छानिएका स्थानहरूमा पानी, बिजुली र शौचालयको सुविधा सुनिश्चित गर्न सरसफाइ कार्य सम्पन्न भइसकेको छ,” विज्ञप्तिमा उल्लेख छ ।

सुकुम्बासीलाई राख्नका लागि हाल चयन गरिएका संरचनाहरू यसअघि नै निर्माण गरिएका हुन् । ती संरचनाहरूलाई अहिले वास्तविक सुकुम्बासी व्यवस्थापनका लागि पूर्ण रूपमा प्रयोगमा ल्याउन लागिएको जनाइएको छ ।

काठमाडौँ । बलेफी गाउँपालिका–४ फ्याफुल्ल युवा क्लब, डाँडागाउँमा बिहीबार आयोजित स्वास्थ्य शिविरबाट ६५३ जनाले सेवा लिएका छन्।
एकीकृत जनस्वास्थ्य तथा पोषण प्रवर्द्धन अभियान अन्तर्गत सञ्चालन गरिएको उक्त शिविर जनस्वास्थ्य कार्यालय सिन्धुपाल्चोकको आयोजना तथा बलेफी गाउँपालिकाको समन्वयमा सम्पन्न भएको हो।
शिविरमा विशेषज्ञ चिकित्सकसहितको टोलीले सामान्य चिकित्सा, बालरोग, नाक–कान–घाँटी, आँखा, दाँत तथा मुख स्वास्थ्य, क्षयरोग स्क्रिनिङ, एक्स–रे सेवा, स्त्री तथा प्रसूति, आयुर्वेद, स्वास्थ्य परीक्षण, उपचार तथा परामर्श सेवा प्रदान गरेको जनस्वास्थ्य कार्यालयका प्रमुख दुर्गा बजगाईले जानकारी दिनुभयो।
ग्रामीण भेगका तथा आर्थिक अभावका कारण अस्पतालसम्म पुग्न नसकेका बिरामीहरूले शिविरबाट प्रत्यक्ष लाभ लिएको गाउँपालिकाका स्वास्थ्य शाखा प्रमुख चेतन घिमिरेले बताउनुभयो।
गाउँपालिका अध्यक्ष गंगा बहादुर तामाङको अध्यक्षतामा भएको कार्यक्रममा प्रमुख अतिथि बागमती प्रदेश सभा सदस्य सरल सहयात्री पौडेलरहनुभएको थियो। कार्यक्रममा गाउँपालिका उपाध्यक्ष सरु लामा तामाङ, प्रमुख प्रशासकीय अधिकृत होमबहादुर राउत, वडा अध्यक्ष सुर्जे तामाङ तथा फ्याफुल्ल युवा क्लबका अध्यक्ष देबेन्द्र तामाङलगायतको उपस्थिति रहेको थियो।
यसअघि बुधबार जलविरेस्थित बलेफी गाउँपालिका–१ मा आयोजित स्वास्थ्य शिविरबाट ७६० जनाले सेवा लिएका थिए।