नुवाकोटको सिर्खलीमा २०० जनाले लिए स्वास्थ्य सेवा, १०१ ज्येष्ठ नागरिक लाभान्वित

नुवाकोट । भोटेकोसी बाढीका कारण नियमित सेवन गर्दै आएका औषधि गुमाएका ज्येष्ठ नागरिकलाई लक्षित गर्दै नुवाकोटको विदुर नगरपालिका–३, सिर्खलीमा निःशुल्क स्वास्थ्य शिविर सञ्चालन गरिएको छ।

शनिबार सञ्चालन गरिएको शिविरबाट २०० जनाले स्वास्थ्य सेवा लिएका छन्। आयोजकका अनुसार शिविरबाट १०१ जना ज्येष्ठ नागरिक प्रत्यक्ष रूपमा लाभान्वित भएका छन्। लाभान्वित ज्येष्ठ नागरिकमध्ये ४८ जना महिला र ५३ जना पुरुष रहेका छन्।

गत भदौ १० गते रसुवाको भोटेकोसी क्षेत्रमा आएको भीषण बाढीका कारण सुगर, प्रेसरलगायत नसर्ने तथा दीर्घरोगका लागि नियमित सेवन गर्दै आएका औषधि बगेपछि प्रभावित नागरिकलाई लक्षित गरी शिविर सञ्चालन गरिएको हो।

शिविरमा स्वास्थ्य परीक्षण, विशेषज्ञ चिकित्सकीय परामर्श तथा आवश्यक औषधि निःशुल्क उपलब्ध गराइएको थियो। ज्येष्ठ नागरिकका विभिन्न स्वास्थ्य समस्या, मुटुरोग, दन्तरोग तथा अर्थोपेडिकसम्बन्धी स्वास्थ्य सेवा प्रदान गरिएको आयोजकले जनाएको छ।

बाढीपछि मानसिक तनावमा रहेका प्रभावित परिवारलाई समेत लक्षित गर्दै २५ जना ज्येष्ठ नागरिक तथा उनीहरूका परिवारका सदस्यलाई तनाव व्यवस्थापन तथा मनोसामाजिक परामर्श दिइएको थियो।

त्यसैगरी, बाढी प्रभावित क्षेत्रमा उद्धार तथा व्यवस्थापनमा खटिएका नेपाली सेना र सशस्त्र प्रहरी बलका बेसलाई आवश्यक केही महत्वपूर्ण औषधिसमेत उपलब्ध गराइएको आयोजकले जनाएको छ।

शिविर विभिन्न सामाजिक संघसंस्थाको संयुक्त आयोजनामा सञ्चालन गरिएको हो। बाढीका कारण नियमित उपचार तथा औषधि सेवनमा समस्या भोगिरहेका प्रभावित नागरिकलाई तत्काल स्वास्थ्य सेवा र औषधि उपलब्ध गराउने उद्देश्यले शिविर आयोजना गरिएको आयोजकको भनाइ छ।

नुवाकोट । भोटेकोसी बाढीमा नियमित खाने औषधि गुमाएका ज्येष्ठ नागरिकलाई लक्षित गर्दै नुवाकोटको विदुर नगरपालिका–३, सिर्खलीमा निःशुल्क स्वास्थ्य शिविर सञ्चालन गरिएको छ।

शनिबार भएको शिविरमा २०० जनाले स्वास्थ्य सेवा लिए। आयोजकका अनुसार १०१ जना ज्येष्ठ नागरिक प्रत्यक्ष रूपमा लाभान्वित भएका छन्। लाभान्वितमध्ये ४८ जना महिला र ५३ जना पुरुष छन्।

गत भदौ १० गते रसुवाको भोटेकोसी क्षेत्रमा आएको ठूलो बाढीमा सुगर, प्रेसरलगायत नसर्ने तथा दीर्घरोगका लागि नियमित खाने औषधि बगेपछि प्रभावित नागरिकलाई लक्षित गरेर शिविर आयोजना गरिएको हो।

शिविरमा स्वास्थ्य परीक्षण, विशेषज्ञ चिकित्सकको परामर्श र आवश्यक औषधि निःशुल्क दिइएको थियो। ज्येष्ठ नागरिकका विभिन्न स्वास्थ्य समस्या, मुटुरोग, दन्तरोग र हाडजोर्नीसँग सम्बन्धित सेवा पनि उपलब्ध गराइएको आयोजकले जनाएको छ।

बाढीपछि मानसिक तनावमा रहेका प्रभावित परिवारलाई पनि लक्षित गर्दै २५ जना ज्येष्ठ नागरिक तथा उनीहरूका परिवारका सदस्यलाई तनाव व्यवस्थापन र मनोसामाजिक परामर्श दिइएको थियो।

त्यस्तै, बाढी प्रभावित क्षेत्रमा उद्धार तथा व्यवस्थापनमा खटिएका नेपाली सेना र सशस्त्र प्रहरी बलका बेसलाई केही आवश्यक औषधि पनि उपलब्ध गराइएको आयोजकले जनाएको छ।

विभिन्न सामाजिक संघसंस्थाको संयुक्त आयोजनामा शिविर सञ्चालन गरिएको हो। बाढीका कारण नियमित उपचार र औषधि सेवनमा समस्या भोगिरहेका प्रभावित नागरिकलाई तत्काल स्वास्थ्य सेवा र औषधि उपलब्ध गराउने उद्देश्यले शिविर आयोजना गरिएको आयोजकले जनाएको छ।

प्रधानमन्त्री दैवी प्रकोप उद्धार कोषमा बैंक र कर्मचारीको एक दिनको पारिश्रमिकसहित रकम जम्मा
काठमाडौं । भोटेकोशी–त्रिशुली नदीमा आएको विनाशकारी बाढीबाट प्रभावित नागरिकको राहत, उद्धार तथा पुनःस्थापनाका लागि महालक्ष्मी विकास बैंकले प्रधानमन्त्री दैवी प्रकोप उद्धार कोषमा ५१ लाख रुपैयाँ सहयोग गरेको छ।
बैंकले २०८३ भदौ १० गते आएको भीषण बाढीबाट प्रभावित नागरिकलाई सहयोग पुर्‍याउने उद्देश्यले उक्त रकम प्रदान गरेको हो।
बाढीका कारण रसुवा, नुवाकोट, धादिङ र चितवन लगायतका जिल्लाका विभिन्न क्षेत्रमा ठूलो जनधनको क्षति भएको थियो। रसुवागढी, टिमुरे, स्याफ्रुबेशी, बेत्रावती, त्रिशुली, देवीघाटलगायतका क्षेत्रमा बाढीले ठूलो क्षति पुर्‍याएको बैंकले जनाएको छ।
विपद्को कठिन परिस्थितिमा प्रभावित नागरिकलाई राहत तथा सहयोग पुर्‍याउने उद्देश्यले बैंकको तर्फबाट तथा बैंकमा कार्यरत कर्मचारीको एक दिन बराबरको पारिश्रमिकसमेत समेटेर कुल ५१ लाख रुपैयाँ सहयोग गरिएको हो।
बैंकले बाढी तथा विपद्का कारण ज्यान गुमाएका सम्पूर्ण नागरिकप्रति श्रद्धाञ्जली व्यक्त गर्दै शोकसन्तप्त परिवारजनप्रति गहिरो समवेदना प्रकट गरेको छ। साथै, घाइतेहरूको शीघ्र स्वास्थ्यलाभको कामना गरेको छ।
महालक्ष्मी विकास बैंकले विपद्को यस कठिन घडीमा प्रभावित परिवार तथा समुदायप्रति ऐक्यबद्धता जनाउँदै राहत, उद्धार र पुनःस्थापनाका लागि भइरहेका प्रयासमा आफ्नो सहयोग निरन्तर रहने प्रतिबद्धता समेत व्यक्त गरेको छ।

काठमाडौं । नेपाल बीमा प्राधिकरणले बीमा अभिकर्ताको व्यावसायिक आचरणलाई व्यवस्थित गर्न विभिन्न स्पष्ट व्यवस्था गरेको छ। प्राधिकरणले २०८३ वैशाख १० गते जारी गरेको बीमा अभिकर्तासम्बन्धी निर्देशनको अनुसूची–१ मा अभिकर्ताले पालना गर्नुपर्ने आचारसंहिता समेटिएको छ।
तर, आचारसंहिताले स्पष्ट रूपमा निषेध गरेका केही गतिविधि अझै पनि बीमा बजारमा देखिने गरेका छन्। विशेषगरी सामाजिक सञ्जालमार्फत गरिने प्रचार, ग्राहकलाई दिइने विभिन्न प्रलोभन, अनधिकृत रूपमा बीमा व्यवसाय सञ्चालन तथा कागजातसम्बन्धी अनियमितताले बजारको व्यावसायिकतामाथि प्रश्न उठाएको छ।
कमिशन फिर्तादेखि उपहारसम्मको प्रलोभन
अभिकर्ताले बीमा व्यवसायमा अस्वस्थ प्रतिस्पर्धा गर्न, अर्को अभिकर्ताको व्यवसायमा अनावश्यक हस्तक्षेप गर्न वा ग्राहकलाई बीमा गराउन कमिशन फिर्ता दिने, उपहार दिने अथवा बीमालेखमा उल्लेख नभएका गैरकानुनी सुविधा दिने कबोल गर्न पाइँदैन।
तर, पछिल्लो समय सामाजिक सञ्जालमा ‘डिस्काउन्ट’, ‘छुट’ लगायतका शब्द प्रयोग गर्दै ग्राहक आकर्षित गर्ने गतिविधि देखिने गरेका छन्।
लाइसेन्सबिनै अभिकर्ताको भूमिका
अभिकर्ताको वैध इजाजतपत्रबिना वा इजाजतपत्र नवीकरण नगरी बीमालेख बिक्री गर्नसमेत रोक लगाइएको छ।
तर, कतिपय अवस्थामा श्रीमान–श्रीमती, छोराछोरी, बुहारी वा दाजुभाइको नाममा जारी भएको अभिकर्ता लाइसेन्स प्रयोग गरी सम्बन्धित व्यक्ति आफैँ अभिकर्ताका रूपमा प्रस्तुत हुने गरेको गुनासो छ। यसले इजाजतपत्रको वास्तविक प्रयोगकर्ता को हो भन्ने प्रश्नसमेत उठाउने गरेको छ।
बीमितको व्यक्तिगत विवरण सामाजिक सञ्जालमा
बीमितको स्वास्थ्य अवस्था, उपचारसम्बन्धी अभिलेख, उमेर, आयस्रोत तथा अन्य व्यक्तिगत विवरण गोप्य राख्नुपर्ने व्यवस्था छ। बीमकबाहेक अन्य व्यक्ति वा संस्थालाई यस्तो विवरण अनधिकृत रूपमा उपलब्ध गराउन पाइँदैन।
तर, केही अभिकर्ताले बीमितको पहिचान खुल्ने विवरण र तस्बिरसमेत सामाजिक सञ्जालमा सार्वजनिक गर्ने गरेका छन्। यसले ग्राहकको गोपनीयताको अधिकारमाथि प्रश्न उठाएको छ।
ग्राहकलाई करकाप र अनावश्यक दबाब
अभिकर्ताले ग्राहकसँग दुर्व्यवहार गर्न, अनावश्यक दबाब दिन वा बीमितको इच्छाविपरीत बीमालेख परिवर्तन गर्न उत्प्रेरित गर्न हुँदैन।
ग्राहकलाई बीमाको वास्तविक आवश्यकता र सुविधाबारे जानकारी दिनुको सट्टा जबर्जस्ती निर्णय गराउने प्रवृत्तिले अभिकर्ता पेशाको विश्वसनीयता कमजोर पार्न सक्छ।
दाबी भुक्तानीका नाममा अनधिकृत शुल्क
बीमालेखबाट प्राप्त हुने रकमको कुनै अंश बीमित वा हकवालाबाट लिन तथा प्रस्ताव स्वीकृत नभएसम्म बीमाशुल्कको रकम बुझिलिनसमेत आचारसंहिताले रोक लगाएको छ।
विशेषगरी वैदेशिक रोजगार बीमाको दाबी भुक्तानी गराउन पहल गरिदिने भन्दै केही व्यक्तिबाट अनधिकृत सेवा शुल्क लिने गरेको गुनासोसमेत सुनिने गरेको छ।
बीमकसँग दोहोरो भूमिका
अभिकर्ताले कुनै बीमकको तलबी कर्मचारी, परामर्शदाता, सर्भेयर, सल्लाहकार वा लेखापरीक्षकका रूपमा समेत काम गर्न नपाउने व्यवस्था छ।
यस्तो व्यवस्था हुँदाहुँदै अभिकर्ता र बीमकबीचको व्यावसायिक सम्बन्धमा स्वार्थको द्वन्द्व सिर्जना हुन सक्ने अवस्थाप्रति पनि प्रश्न उठ्दै आएको छ।
बीमालेखमा नभएका सुविधा दिने आश्वासन
निर्धारित बीमादरभन्दा फरक दरमा व्यवसाय गर्ने, बीमाशुल्क आफैँ निर्धारण गर्ने वा बीमालेखमा उल्लेख नभएका सेवा–सुविधा दिने आश्वासन दिनसमेत पाइँदैन।
तर, कतिपय अभिकर्ताले बीमालेखमा नभएका सुविधा तथा सर्तलाई ग्राहकसमक्ष छुट वा अतिरिक्त लाभका रूपमा प्रस्तुत गर्ने गरेको पाइन्छ। उदाहरणका रूपमा बीमांकको निश्चित प्रतिशत रकम वार्षिक रूपमा अग्रिम भुक्तानी हुने सुविधालाई नै बीमाशुल्क छुटका रूपमा व्याख्या गरी ग्राहकलाई भ्रममा पार्ने गतिविधि देखिएको छ।
प्रतिस्पर्धी बीमकविरुद्ध भ्रामक प्रचार
आफूले प्रतिनिधित्व नगर्ने बीमक वा आफू आबद्ध बीमकको क्षमता र सेवाका सम्बन्धमा गलत, भ्रामक वा अतिरञ्जित प्रचार गर्न पनि आचारसंहिताले रोक लगाएको छ।
तर, सामाजिक सञ्जालमा अन्य बीमकलाई नकारात्मक देखाउने सामग्री भेटिएमा त्यसलाई पुनः साझा गर्ने प्रवृत्तिसमेत देखिएको छ। यस्तो गतिविधिले स्वस्थ प्रतिस्पर्धाको वातावरण बिगार्न सक्ने देखिन्छ।
फर्जी कागजात प्रयोगको जोखिम
बीमा व्यवसायमा जालसाजी वा कीर्ते गरी गलत विवरण तथा कागजात तयार गर्ने कार्य गम्भीर रूपमा निषेध गरिएको छ।
तर, बीमितको आयस्रोत पुष्टि गर्न नक्कली सिफारिसपत्र तयार गर्ने, अन्डरराइटिङका लागि फर्जी स्वास्थ्य परीक्षण प्रतिवेदन प्रयोग गर्ने वा उपलब्ध गराउने जस्ता गतिविधि हुन सक्ने अवस्था देखिएको छ। यस्ता कार्यले बीमक र बीमित दुवैलाई दीर्घकालीन जोखिममा पार्न सक्छ।
स्वामित्वमा समेत बन्देज
कुनै बीमकको अभिकर्ता भएर काम गर्ने व्यक्ति, संस्था, सञ्चालक वा निजको एकाघर परिवारका सदस्यले सोही बीमकको संस्थापक, सञ्चालक वा आधारभूत शेयरधनी बन्न नपाउने व्यवस्था पनि आचारसंहितामा छ।
यसको उद्देश्य अभिकर्ता र बीमकबीच हुने सम्भावित स्वार्थको द्वन्द्वलाई नियन्त्रण गर्नु हो।
सम्पत्ति शुद्धीकरणसम्बन्धी कानुन उल्लंघन गर्न नपाइने
अभिकर्ताले आफ्नो व्यावसायिक गतिविधि सञ्चालन गर्दा बीमा कानुनसँगै भ्रष्टाचार निवारण ऐन, सम्पत्ति शुद्धीकरण निवारण ऐनलगायत प्रचलित कानुनको समेत पालना गर्नुपर्छ।
स्रोत नखुलेको सम्पत्तिलाई जीवन बीमामार्फत व्यवस्थापन वा शुद्धीकरण गर्ने उपाय सुझाउने तथा बीमकलाई दबाब दिएर त्यस्ता व्यक्तिको बीमालेख जारी गराउने गतिविधि भएमा त्यो गम्भीर कानुनी प्रश्न बन्न सक्छ।
आचारसंहिता पालनामा कडाइ आवश्यक
बीमा व्यवसायमा अभिकर्ता ग्राहक र बीमकबीचको महत्वपूर्ण सम्पर्क व्यक्ति हुन्। त्यसैले अभिकर्ताको व्यवहारले समग्र बीमा क्षेत्रप्रतिको जनविश्वासमा प्रत्यक्ष प्रभाव पार्छ।
आचारसंहितामा स्पष्ट रूपमा निषेध गरिएका गतिविधि नियन्त्रण गर्न प्रभावकारी अनुगमन, उजुरीमाथि छानबिन तथा आवश्यक कारबाहीलाई थप प्रभावकारी बनाउनुपर्ने आवश्यकता देखिन्छ। व्यावसायिक मर्यादा कायम राख्दै पारदर्शी र स्वस्थ प्रतिस्पर्धाको वातावरण बनाउन अभिकर्ता स्वयं पनि आचारसंहिता पालनामा जिम्मेवार बन्नुपर्ने देखिन्छ।

काठमाडौं । चीनतर्फबाट आएको भीषण बाढीका कारण त्रिशूली नदी तथा आसपासका क्षेत्रमा ठूलो जनधनसँगै सडक तथा पुल पूर्वाधारमा समेत व्यापक क्षति पुगेको छ।

सडक विभागका अनुसार धादिङ, नुवाकोट र रसुवामा करिब ५५ किलोमिटर सडक तथा ३५ वटा पुल पूर्ण रूपमा क्षतिग्रस्त भएका छन्। क्षतिग्रस्त पूर्वाधारको पुनर्निर्माणमा करिब ३० अर्ब रुपैयाँ बराबरको प्रारम्भिक क्षति भएको अनुमान गरिएको छ।

बाढीका कारण अवरुद्ध राजमार्ग तथा रणनीतिक सडक तत्काल सञ्चालनमा ल्याउन सरकारले आपत्कालीन पुनर्निर्माण र बेलिब्रिज व्यवस्थापनको काम तीव्र पारेको छ। क्षतिग्रस्त सडकमा नयाँ ट्र्याक खोल्ने तथा भत्किएका पुलको स्थानमा बेलिब्रिज जडान गर्ने कामलाई प्राथमिकताका साथ अघि बढाइएको सडक विभागले जनाएको छ।

देवीघाटमा बेलिब्रिज जडान सुरु

नुवाकोटको विदुरस्थित देवीघाटमा बाढीले पुल बगाएपछि अवरुद्ध यातायात सञ्चालनमा ल्याउन नेपाली सेनाले बेलिब्रिज जडानको काम थालेको छ।

सडक विभागका प्रवक्ता शुभराज न्यौपानेका अनुसार पुलको सिभिल संरचना निर्माणको काम विभागले गरिरहेको छ भने पुल जडानको प्राविधिक काम नेपाली सेनाले सम्हालेको छ।

देवीघाटस्थित तादी खोलामा ६० मिटर लामो एक्रो ब्रिज जडान सुरु भएको सेनाले जनाएको छ।

भदौ १० गते भोटेकोशीमा आएको भीषण बाढीले यहाँको करिब ५५ मिटर लामो पक्की पुल बगाएको थियो। सोही पुलको अबुटमेन्टमा नयाँ एक्रो ब्रिज जडान गर्न थालिएको हो। पुल निर्माण सम्पन्न भएपछि रसुवातर्फको यातायात पहुँच सहज हुने अपेक्षा गरिएको छ।

यस्तै त्रिशूली बजार र बेत्रावतीमा पनि बेलिब्रिज जडान गर्ने तयारी भइरहेको छ। यी स्थानमा करिब ४८ मिटर लामो पुल आवश्यक पर्ने देखिएको विभागले जनाएको छ।

क्षतिग्रस्त ३५ पुलमध्ये तत्काल तीन स्थानमा बेलिब्रिज जडान गरी गल्छी–त्रिशूली–स्याफ्रुबेँसी–रसुवागढी सडक सञ्चालनमा ल्याउने तयारी भइरहेको छ।

स्याफ्रुबेँसीमा ७५ मिटरको बेलिब्रिज आवश्यक

रसुवाको स्याफ्रुबेँसीमा समेत पुल बगाएकाले करिब ७५ मिटर लामो बेलिब्रिज आवश्यक पर्ने देखिएको छ।

सडक विभाग र नेपाली सेनासँग बेलिब्रिज उपलब्ध भए पनि तल्लो खण्डको सडक अवरुद्ध रहेकाले सामग्री घटनास्थलसम्म पुर्‍याउन समस्या भएको छ। सडक खुल्नेबित्तिकै बेलिब्रिजका सामग्री पुर्‍याएर जडान सुरु गरिने विभागले जनाएको छ।

चीन सरकारले समेत कोराला नाकामा बेलिब्रिजका सामग्री उपलब्ध गराएको छ। ती सामग्री नेपाल ल्याएर आवश्यकता अनुसार रसुवागढी वा अन्य क्षतिग्रस्त स्थानमा जडान गर्ने तयारी भइरहेको छ।

विभागका प्रवक्ता न्यौपानेका अनुसार अहिले मुख्य चुनौती नै बेलिब्रिज लैजानुपर्ने स्थानसम्म सडक पहुँच पुर्‍याउनु हो। सडक खुलेपछि क्षतिग्रस्त स्थानमा बेलिब्रिज जडानको कामले गति लिनेछ।

स्थानीय अवरोधका कारण अस्थायी सडक निर्माणमा ढिलाइ

बाढीले थुपारेको लेदो र गेग्रानका कारण पुरानै सडकबाट तत्काल यातायात सञ्चालन गर्न कठिन भएको छ। त्यसैले बेत्रावतीसम्म वैकल्पिक अस्थायी सडक निर्माण गरी यातायात सञ्चालनमा ल्याउने तयारी गरिएको छ।

तर विदुर नगरपालिका–१० मा स्थानीयको अवरोधका कारण काममा केही ढिलाइ भएको सडक विभागले जनाएको छ।

पुरानो सडकमा तीनदेखि चार मिटरसम्म लेदो र गेग्रान थुप्रिएकाले त्यसलाई हटाउन लामो समय लाग्ने भएपछि विभागले वैकल्पिक रूपमा खेतको बाटो प्रयोग गरी तत्काल ट्र्याक खोल्ने प्रयास गरेको थियो। तर स्थानीयले मुआब्जा नपाएसम्म काम गर्न नदिने अडान राखेपछि समस्या भएको विभागको भनाइ छ।

विवाद समाधान भए दुई दिनभित्रै बेत्रावतीसम्म सडक जोड्ने विभागको योजना छ। बेत्रावती पार गरेपछि धुन्चेसम्मको पहुँच सहज हुने अपेक्षा गरिएको छ।

कृष्णभीरमा नयाँ ट्र्याक खोलियो

त्रिशूलीमा आएको बाढीले पृथ्वी राजमार्गअन्तर्गत कृष्णभीरमा सडक कटान गरेपछि भित्तो काटेर नयाँ ट्र्याक खोल्ने काम भइरहेको छ।

नेपाल जियोटेक्निकल सोसाइटीको प्राविधिक परामर्शमा ५.५ देखि ८ मिटर चौडाइको ट्र्याक खोल्ने तयारी गरिएको छ।

भित्तो काटेर करिब २५२ मिटर ट्र्याक खन्ने काम सम्पन्न भइसकेको छ। यससँगै मेसिन आवतजावत गर्न सक्ने अस्थायी ट्र्याक तयार भएको सडक विभागले जनाएको छ। अब केही दिन मर्मत गरेपछि सवारी सञ्चालनमा ल्याउने तयारी छ।

यसैगरी बाढीका कारण क्षतिग्रस्त पृथ्वी राजमार्गअन्तर्गत धादिङको गजुरी गाउँपालिका–२ स्थित परेवाभिर खण्डमा आज सवारी आवागमन पूर्ण रूपमा बन्द गरी मर्मत कार्य भइरहेको सडक विभागले जनाएको छ।

बाढीबाट क्षतिग्रस्त सडक तथा पुललाई प्राथमिकताका आधारमा पुनर्निर्माण गर्दै अवरुद्ध राजमार्ग तत्काल सञ्चालनमा ल्याउने प्रयास भइरहेको विभागले जनाएको छ।

काठमाडौं । रसुवास्थित भोटेकोशी नदीमा भदौ १० गते आएको विनाशकारी बाढीपछि हालसम्म १ हजार ३३१ जनाको शव फेला परेको छ भने करिब ५ हजार जना अझै सम्पर्कविहीन रहेका छन्।

बाढीबाट ठूलो मानवीय तथा भौतिक क्षति भएपछि सुरक्षा निकायले बेपत्ता भएकाहरूको खोजी तथा उद्धार कार्यलाई तीव्र बनाएका छन्।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार फेला परेका शवमध्ये रसुवामा १५६, नुवाकोटमा १९५, धादिङमा ६७, गोरखामा ७४, तनहुँमा ३८, नवलपरासीपूर्वमा २२२, नवलपरासीपश्चिममा २१९ तथा चितवनमा ३६० रहेका छन्।

प्राधिकरणका प्रवक्ता शान्ति महतका अनुसार सम्पर्कविहीन हुनेमध्ये रसुवा जिल्ला प्रशासन कार्यालयबाट प्राप्त अद्यावधिक विवरणअनुसार करिब १ हजार ९६७ जना र नुवाकोटबाट करिब २ हजार ३४० जना रहेका छन्। यस्तै, ५८९ जना विदेशी नागरिक तथा १०० जना सुरक्षाकर्मी र कर्मचारी समेत सम्पर्कविहीन रहेको विवरणमा उल्लेख छ।

बेपत्ताको सङ्ख्या ठूलो रहेकाले खोजी तथा उद्धार कार्यलाई थप प्रभावकारी बनाइएको प्राधिकरणले जनाएको छ।

बाढी प्रभावित क्षेत्रमा सञ्चालन गरिएको उद्धार अभियानबाट हालसम्म १३ हजार १०१ जनाको उद्धार गरिएको छ। उद्धार गरिएकामध्ये नेपाली सेनाले ४ हजार १६२, नेपाल प्रहरीले ४ हजार ६८ तथा सशस्त्र प्रहरी बलले संयुक्त रूपमा ४ हजार ८७१ जनाको उद्धार गरेको प्राधिकरणले जनाएको छ।

यस्तै, हालसम्म ९८ वटा शवको सनाखत गरी आफन्तलाई बुझाइएको छ।

बाढीपछि घाइते तथा प्रभावित गरी हालसम्म ५ हजार ९२९ जनाको उपचार गरिएको प्रवक्ता महतले जानकारी दिए। विभिन्न अस्पतालमा ३१६ जना, नेपाली सेनाबाट ३ हजार २९७ जना र सशस्त्र प्रहरी बलबाट २ हजार ३१६ जनाले स्वास्थ्योपचार सेवा लिएका छन्।

बाढी प्रभावितका लागि काठमाडौं, रसुवा, नुवाकोट र धादिङमा स्थापना गरिएका ४१ वटा होल्डिङ सेन्टरमा ३ हजार ९८२ जनाले सुरक्षित आश्रय लिइरहेका छन्।

विस्थापित तथा प्रभावितलाई सुरक्षित स्थानमा राख्दै उनीहरूको आधारभूत आवश्यकता पूरा गर्न राज्यका निकायले राहत तथा व्यवस्थापनको काम अघि बढाइरहेका छन्।

भोटेकोशी नदीमा आएको बाढीले एकैपटक ठूलो मानवीय तथा भौतिक क्षति पुर्‍याएपछि सुरक्षा निकाय, स्थानीय तह तथा विभिन्न सरकारी तथा गैरसरकारी निकाय खोजी, उद्धार, उपचार र राहत व्यवस्थापनमा निरन्तर सक्रिय छन्।

प्राधिकरणले सम्पर्कविहीन भएकाहरूको खोजी तथा उद्धार कार्यलाई अझ तीव्र बनाइएको जनाएको छ।

मेलम्ची । रसुवा बाढीपीडितहरूको सहयोगार्थ Unified Youth Network (UYN) मेलम्ची–९ को नेतृत्वमा सञ्चालित राहत अभियानबाट संकलित रु. ४६ हजार ४१७ रुपैयाँ ३४ पैसा प्रधानमन्त्री दैवी प्रकोप उद्धार कोषमा जम्मा गरिएको छ।
देश तथा विदेशमा रहेका नेपालीहरूको सहयोगमा संकलित उक्त रकम २०२६ सेप्टेम्बर ५ गते सम्बन्धित राहत कोषमा जम्मा गरिएको UYN ले जनाएको छ। रकम जम्मा गरिएको कारोबार विवरणको प्रमाणसमेत संस्थाले सार्वजनिक गरेको छ।
UYN मेलम्ची–९ को नेतृत्वमा सञ्चालन भएको अभियानमा विभिन्न व्यक्ति तथा सहयोगीहरूबाट उत्साहजनक सहयोग प्राप्त भएको जनाइएको छ। अभियानबाट कुल रु. ४६,४१७.३४ संकलन भएको थियो।
विपद्को समयमा आर्थिक सहयोग, सद्भाव तथा राहत अभियानमा प्रत्यक्ष र अप्रत्यक्ष रूपमा साथ दिने सम्पूर्ण सहयोगीहरूप्रति UYN ले धन्यवाद तथा आभार व्यक्त गरेको छ।
UYN ले “विपद्को समयमा देखाएको एकता, सहयोग र मानवता नै सबैभन्दा ठूलो शक्ति हो” भन्दै आगामी दिनमा पनि मानवीय सेवाका कार्यमा निरन्तर सक्रिय रहने प्रतिबद्धता जनाएको छ।
संकलित रकम राहत कोषमा जम्मा गरिएको कारोबार विवरणको प्रमाण सार्वजनिक गर्दै UYN ले अभियान सफल बनाउन सहयोग गर्ने सम्पूर्ण व्यक्ति तथा संस्थाप्रति पुनः आभार व्यक्त गरेको छ।

काठमाडौं । सानिमा बैंकले आफ्नो २२औँ वार्षिक साधारणसभा आह्वान गरेको छ।

बैंक सञ्चालक समितिको बिहीबार बसेको बैठकले आगामी असोज १२ गते वार्षिक साधारणसभा गर्ने निर्णय गरेको हो। सभा काठमाडौंको भाटभटेनीस्थित आम्रपाली ब्यांक्वेटमा बिहान ११ बजेदेखि सुरु हुनेछ।

सभाले आर्थिक वर्ष २०८२/८३ का लागि प्रस्तावित १० प्रतिशत नगद लाभांश (करसहित) अनुमोदन गर्नेछ। त्यस्तै, अग्राधिकार शेयरधनीका लागि ८.२५ प्रतिशत नगद लाभांश (करसहित) वितरण गर्ने प्रस्ताव पनि सभाले पारित गर्नेछ।

यसैगरी, सभाले सर्वसाधारण शेयरधनी समूहबाट सञ्चालक समितिमा प्रतिनिधित्व गर्ने २ जना सञ्चालकको निर्वाचन गर्नेछ।

सभामा आर्थिक वर्ष २०८२/८३ को वार्षिक प्रतिवेदन तथा लेखापरीक्षकको प्रतिवेदन स्वीकृत गर्ने प्रस्तावसमेत पेश हुनेछ। साथै, चालु आर्थिक वर्ष २०८३/८४ का लागि लेखापरीक्षक नियुक्ति तथा निजको पारिश्रमिक निर्धारणसम्बन्धी प्रस्ताव अनुमोदन गरिनेछ।

असोज १ गते बुक क्लोज

लाभांश वितरण तथा साधारणसभा प्रयोजनका लागि बैंकले असोज १ गते बुक क्लोज गर्ने निर्णय गरेको छ।

यसअनुसार असोज १ गतेभन्दा अघिसम्म कायम शेयरधनीहरूले मात्रै बैंकको वार्षिक साधारणसभामा सहभागी हुन तथा प्रस्तावित लाभांश प्राप्त गर्न योग्य हुनेछन्।

काठमाडौं । गरिमा विकास बैंकले आर्थिक वर्ष २०८२/८३ को मुनाफाबाट आफ्ना शेयरधनीलाई कुल २० प्रतिशत लाभांश वितरण गर्ने प्रस्ताव गरेको छ।

बैंकको सञ्चालक समितिको बैठकले शेयरधनीलाई १० प्रतिशत बोनस शेयर र १० प्रतिशत नगद लाभांश वितरण गर्ने प्रस्ताव गरेको हो। प्रस्तावित नगद लाभांशमा लाग्ने करसमेत समावेश गरिएको बैंकले जनाएको छ।

हाल बैंकको चुक्ता पुँजी करिब ६ अर्ब २ करोड रुपैयाँ रहेको छ। प्रस्तावित १० प्रतिशत बोनस शेयर वितरणपछि बैंकको चुक्ता पुँजी ६ अर्ब ६२ करोड रुपैयाँभन्दा बढी पुग्नेछ।

यद्यपि प्रस्तावित लाभांश वितरणका लागि नेपाल राष्ट्र बैंकको स्वीकृति लिन बाँकी छ। राष्ट्र बैंकबाट स्वीकृति प्राप्त भएपछि बैंकको आगामी वार्षिक साधारणसभाले प्रस्ताव पारित गर्नुपर्नेछ। साधारणसभाबाट पारित भएपछि मात्रै शेयरधनीले लाभांश प्राप्त गर्नेछन्।

गरिमा विकास बैंकको यो प्रस्तावसँगै विकास बैंकहरूबीच शेयरधनीलाई आकर्षक प्रतिफल दिने प्रतिस्पर्धा थप बढेको देखिएको छ। पछिल्लो समय विकास बैंकहरूले मुनाफाबाट शेयरधनीलाई उल्लेख्य लाभांश वितरण गर्ने प्रस्ताव अघि बढाउन थालेका छन्।

काठमाडौं । नेपालीको प्रमुख चाड दशैं नजिकिँदै गर्दा चीनबाट आयात गरिएका चाडपर्व लक्षित सामानको आपूर्ति प्रभावित भएको छ। रसुवाको भोटेकोशी नदीमा आएको बाढीले नेपाल–चीन व्यापारको प्रमुख स्थलमार्ग अवरुद्ध बनाएपछि दशैं–तिहारका लागि मगाइएका ठूलो परिमाणका सामान बाटोमै रोकिएका हुन्।

व्यवसायीहरूले असार र साउनमै चीनमा अर्डर गरेका रेडिमेड कपडा, जुत्ता–चप्पल, ब्याग, विद्युतीय सामग्री, फलफूललगायतका सामान केरुङदेखि रसुवा भन्सारसम्म विभिन्न चरणमा रोकिएका थिए। केही सामान बाढीमा बगेका छन् भने केही कन्टेनर अझै केरुङमै रोकिएका छन्।

४ सयभन्दा बढी कन्टेनर प्रभावित

नेपाल हिमालय सीमापार वाणिज्य संघका अध्यक्ष रामहरि कार्कीका अनुसार बाढीमा ४ सयभन्दा बढी कन्टेनर हराएका छन्। तीमध्ये करिब २ सय कन्टेनरमा व्यापारिक सामान रहेको र बाँकी खाली कन्टेनर रहेको उनको भनाइ छ।

बाढीमा बगेका कन्टेनरमा मुख्यतः दशैं–तिहारका लागि ल्याइएका कपडा, जुत्ता–चप्पल, विद्युतीय सामग्री र फलफूल थिए।

कार्कीका अनुसार करिब ७०–७१ वटा कन्टेनरमा रहेको सामानको भन्सार राजस्वबापत १८ करोड रुपैयाँभन्दा बढी रकम बुझाइसकिएको थियो। प्रारम्भिक अनुमानमा बाढीबाट २ अर्ब रुपैयाँभन्दा बढी मूल्यको व्यापारिक सामान क्षति भएको व्यवसायीहरूले बताएका छन्।

यद्यपि क्षतिको यकिन विवरण भने सरकारी निकायबाट सार्वजनिक भइसकेको छैन।

१७६ कन्टेनर अझै केरुङमै

बाढीका कारण सबै सामान नष्ट भएका छैनन्। नेपाली व्यापारीका लागि सामान बोकेका १७६ वटा कन्टेनर अझै केरुङ क्षेत्रमा रोकिएका छन्।

यी सामानलाई वैकल्पिक माध्यमबाट नेपाल ल्याउने प्रयास भइरहेको भए पनि नाका नियमित रूपमा सञ्चालनमा नआएसम्म ठूलो परिमाणमा सामान भित्र्याउन कठिन हुने व्यवसायीहरू बताउँछन्।

दशैंको मुख्य सिजनमै व्यापार प्रभावित

दशैं–तिहार व्यापारीका लागि वर्षकै महत्वपूर्ण बिक्री सिजन हो। यही समयमा चीनसँगको प्रमुख व्यापारिक नाका अवरुद्ध हुँदा व्यापारीको कारोबारसँगै नगद प्रवाहमा समेत दबाब परेको छ।

व्यवसायीहरूले दशैंका लागि सामान खरिद गर्न बैंकको चालु पुँजी कर्जा, आयात कर्जा तथा प्रतितपत्रलगायत वित्तीय स्रोत प्रयोग गरेका हुन्छन्। सामान बिक्री भएपछि प्राप्त रकमबाट ऋण र ब्याज तिर्ने व्यापारिक चक्र चल्ने भए पनि यसपटक सामान बजारसम्म पुग्न नसक्दा समस्या बढेको हो।

यसको असर व्यापारीको लगानीसँगै बैंकिङ क्षेत्रबाट प्रवाह भएको कर्जामा समेत पर्न सक्ने जोखिम देखिएको छ।

तातोपानीबाट पनि तत्काल राहत भएन

रसुवागढी नाका अवरुद्ध भएपछि व्यापारीहरूले तातोपानीलाई वैकल्पिक मार्गका रूपमा प्रयोग गर्ने अपेक्षा गरेका थिए। तर तातोपानीबाट पनि तत्काल ठूलो परिमाणमा कार्गो भित्र्याउने अवस्था बन्न सकेको छैन।

चिनियाँ पक्षले तातोपानी नाकाबाट कार्गो आवागमन अस्थायी रूपमा रोकेको जानकारी दिएको छ। पुनः कहिलेदेखि नियमित सञ्चालन हुन्छ भन्ने स्पष्ट मिति भने दिइएको छैन।

यससँगै नेपाल–चीन व्यापारका दुई प्रमुख स्थलमार्ग एकैपटक प्रभावित भएका छन्।

कोरला नाकाबाट ल्याउने प्रयास

रसुवागढी र तातोपानीमा समस्या आएपछि सरकारले मुस्ताङको कोरला नाकालाई वैकल्पिक मार्गका रूपमा अघि बढाउन थालेको छ।

तर ठूलो परिमाणको आयात तत्काल कोरलाबाट व्यवस्थापन गर्न कठिन हुने विज्ञहरूको भनाइ छ। भन्सार, सडक तथा अन्य पूर्वाधारको क्षमता पर्याप्त नभएकाले रसुवागढीको पूर्ण विकल्प बन्न समय लाग्ने देखिएको छ।

समुद्री मार्गबाट सामान ल्याउन ढिलो

उत्तरी नाकामा पटक–पटक समस्या आउन थालेपछि चीनबाट सामान ल्याउन नेपाली व्यवसायीले समुद्री मार्गको प्रयोग बढाउन थालेका छन्।

तर दशैंको तत्कालीन माग पूरा गर्न यो प्रभावकारी विकल्प बन्न कठिन छ। स्थलमार्गबाट काठमाडौंसम्म सामान ल्याउन सामान्य अवस्थामा करिब १२–१३ दिन लाग्ने भए पनि समुद्री मार्गबाट ल्याउँदा ५५ देखि ६५ दिनसम्म लाग्न सक्छ।

सामानको मूल्य बढ्ने जोखिम

चीनबाट आउने सामानको आपूर्ति घट्नु र वैकल्पिक मार्ग प्रयोग गर्दा ढुवानी खर्च बढ्नुले बजारभाउमा समेत असर पर्न सक्ने देखिएको छ।

व्यवसायीहरूका अनुसार सामान्य अवस्थामा करिब डेढदेखि दुई लाख रुपैयाँ लाग्ने कन्टेनर ढुवानी खर्च अहिले तीनदेखि चार लाख रुपैयाँसम्म पुगेको छ।

आपूर्ति घट्ने र ढुवानी खर्च बढ्ने हो भने केही वस्तुको मूल्य १० देखि २० प्रतिशतसम्म बढ्न सक्ने जोखिम रहेको व्यवसायीहरूले बताएका छन्।

दशैं नजिकिँदै गर्दा चीनबाट मगाइएका चाडपर्व लक्षित सामानको ठूलो हिस्सा अझै आपूर्ति शृंखलामै अड्किएको छ। केही सामान बाढीले बगाएको, केही केरुङमा रोकिएको र केहीलाई वैकल्पिक नाकाबाट नेपाल ल्याउने प्रयास भइरहेकाले यस वर्षको दशैं बजारमा सामानको अभाव, मूल्यवृद्धि र व्यापारीको नगद प्रवाहमा दबाब पर्ने जोखिम बढेको छ।

काठमाडौं । रिलायबल नेपाल लाइफ इन्स्योरेन्स कम्पनीको २ लाखभन्दा बढी कित्ता संस्थापक शेयर बिक्रीमा राखिएको छ।

कम्पनीले संस्थापक समूहअन्तर्गतको २ लाख २ हजार ७९८ कित्ता शेयर बिक्री गर्न लागेको हो। हाललाई उक्त शेयर कम्पनीका विद्यमान संस्थापक शेयरधनीहरूले मात्रै खरिद गर्न पाउनेछन्।

शेयर खरिद गर्न इच्छुक संस्थापक शेयरधनीले ३५ दिनभित्र आवेदन दिनुपर्नेछ।

आवेदन रिलायबल नेपाल लाइफको शेयर रजिस्ट्रार रिलायबल इन्भेस्टमेन्ट एन्ड मर्चेन्ट क्यापिटलको बालुवाटारस्थित कार्यालय वा कम्पनीको ज्ञानेश्वरस्थित केन्द्रीय कार्यालयमा बुझाउन सकिनेछ।

तोकिएको समयभित्र विद्यमान संस्थापक शेयरधनीबाट पर्याप्त आवेदन नपरेमा उक्त शेयर अन्य व्यक्ति तथा संस्थाका लागि समेत बिक्री खुला गरिने कम्पनीले जनाएको छ।

के तपाईंलाई यो शेयर खरिदको मौका मिल्न सक्छ?

हालको चरणमा विद्यमान संस्थापक शेयरधनीले मात्रै आवेदन दिन पाउने भएकाले सर्वसाधारण लगानीकर्ताले तत्काल आवेदन दिन पाउने अवस्था छैन। संस्थापकबाट आवेदन नपरेपछि मात्रै अन्य लगानीकर्ताका लागि बिक्री खुला हुन सक्नेछ।