रूपन्देही । राष्ट्रिय स्वतन्त्र पार्टी ९रास्वपा० लुम्बिनी प्रदेश अधिवेशनअन्तर्गत सभापति पदको निर्वाचनमा कुनै पनि उम्मेदवारले स्पष्ट बहुमत प्राप्त गर्न नसकेपछि पुनः मतदान हुने भएको छ।
मुख्य निर्वाचन अधिकृत गोकुल सापकोटाका अनुसार सभापति पदका लागि ६ जना उम्मेदवारबीच प्रतिस्पर्धा भएको थियो। पहिलो चरणको मतदानमा रुपन्देहीका शालिकराम घिमिरेले सबैभन्दा बढी १९९ मत प्राप्त गरेका छन् भने अर्घाखाँचीका गोपाल घिमिरेले ८७ मत ल्याएका छन्। अन्य उम्मेदवारमध्ये गणेश पौडेलले ८४, डा। राजकुमार सुवेदीले ८०, मञ्जु भुसालले ७१ तथा मधुप्रसाद अर्यालले १९ मत प्राप्त गरेका छन्।
कुनै उम्मेदवारले आवश्यक बहुमत हासिल गर्न नसकेपछि सर्वाधिक मत प्राप्त गर्ने शालिकराम घिमिरे र गोपाल घिमिरेबीच पुनः मतदान गरिने निर्वाचन समितिले जनाएको छ।
हिजो राति सम्पन्न मतदानमा कुल ५५२ मत खसेको थियो। नेतृत्व चयनको प्रतिस्पर्धामा रहेका शालिकराम घिमिरे सभापति रवि लामिछाने निकट पक्षका उम्मेदवार मानिन्छन् भने गोपाल घिमिरेलाई काठमाडौं महानगरपालिकाका प्रमुख बालेन्द्र शाह निकट पक्षका उम्मेदवारका रूपमा हेरिएको छ।
पहिलो चरणको मत परिणामले शालिकराम घिमिरेलाई अग्रस्थानमा राखेको भए पनि अन्तिम नेतृत्व चयनका लागि अब हुने दोस्रो चरणको मतदान निर्णायक हुने देखिएको छ।
काठमाडौँ । परराष्ट्रमन्त्री शिशिर खनाल आज चारदिने औपचारिक भ्रमणका लागि चीनको राजधानी बेइजिङ प्रस्थान गरेका छन्। उनी चिनियाँ विदेशमन्त्री वाङ यी को निमन्त्रणामा चीन भ्रमणमा गएका हुन्।
परराष्ट्र मन्त्रालयका अनुसार भ्रमणका क्रममा मन्त्री खनालले आफ्ना समकक्षी वाङ यीसँग नेपाल–चीन सम्बन्धलाई थप सुदृढ बनाउने, द्विपक्षीय सहकार्य विस्तार गर्ने तथा आपसी हितका विविध विषयमा छलफल गर्ने कार्यक्रम रहेको छ। उनले चीनका उच्च सरकारी अधिकारीहरूसँग समेत भेटवार्ता गर्नेछन्।
भ्रमणका क्रममा बेइजिङस्थित नेपाली दूतावासले आयोजना गर्ने लगानी सम्मेलनमा मन्त्री खनाल सहभागी हुनेछन्। सम्मेलनमा उनले चिनियाँ उद्यमी तथा व्यवसायीहरूसँग नेपालमा लगानीका सम्भावना र अवसरबारे छलफल गर्ने कार्यक्रम तय गरिएको छ।
यसैबीच, परराष्ट्रमन्त्री खनालको सम्मानमा नेपाली दूतावासले स्वागत समारोहको आयोजना गर्ने भएको छ। उक्त कार्यक्रममा उनले चीनमा रहेका नेपाली समुदायसँग अन्तरक्रिया गर्नेछन्।
मन्त्री खनाल आगामी असार ३ गते स्वदेश फर्किने कार्यक्रम रहेको परराष्ट्र मन्त्रालयले जनाएको छ।
